په افغانستان کې د روغتیا نړیوال سازمان (WHO) اعلان کړی، چې د شري واکسین د کمپاین په دویم پړاو کې له اته میلیونه زیاتو ماشومانو واکسین تر لاسه کړی دی.
رخشانه: دغه بنسټ نن (چهارشنبې د لړم ۲۸ مه) په یوه اعلامیه کې په هېواد کې د شري واکسین د دویم پړاو د پای ته رسېدو خبر ورکړی دی.
دغه کمپاین د روغتیا نړیوال سازمان (WHO) د ملګرو ملتونو د ماشومانو د ملاتړ صندوق (یونیسف) او د واکسین اتحاد (Gavi) له خوا تر سره شوی دی.
په دې کمپاین کې چې د روان میلادي کال د اکتوبر له ۱۹ مې پیل شوی وو، تر اته میلیونه او ۳۵۵ زره زیات ماشومان چې عمرونه یې له شپږ میاشتو تر ۱۰ کلونو پورې وو په ۱۷ ولایتونو کې د شري یو دوز واکسین تر لاسه کړ.
د دې بنسټ په وینا، د هېواد په پنځو ختیځو او سویل ختیځو ولایتونو کې له درې میلیونه او ۹۵۳ زره زیاتو ماشومانو د پولیو یو خوراک واکسین هم تر لاسه کړ.
په افغانستان کې د روغتیا نړیوال سازمان استازي ډاکتر ادوین سنیزا سالوادور ویلي، د نه میلیونه افغان ماشومانو لپاره د شري ناروغۍ د واکسین دویم ملي کمپاین پلي کول د روغتیا نړیوال سازمان، روغتیايي چارواکو او شریکانو ژمنتیا ښي، چې ماشومان د مخنیوي وړ ناروغیو څخه خوندي کوي.
په افغانستان کې د یونیسف استازي ډاکتر تاج الدین اویواله هم د شري واکسین د کمپاین د دویم پړاو پای ته رسېدل د دې ناروغۍ پر وړاندې د ماشومانو د خوندیتوب لپاره مهم ګام وباله.
په افغانستان کې د شري واکسین د ملي کمپاین د دواړو پړاونو په بشپړېدو سره له ۱۶.۶ میلیونه زیات ماشومان د دې وژونکې خو مخنیوي وړ ناروغۍ څخه خوندي شوي دي.
څه موده وړاندې د روغتیا نړیوال سازمان په هېواد کې د شري ناروغۍ پېښو د زیاتېدو خبر ورکړی وو او له خلکو یې غوښتي وو چې خپل ماشومان واکسین کړي.
شری یو له خورا ساري ناروغیو څخه ده او د ماشومانو په منځ کې د واکسین په واسطه د مخنیوي وړ مړینې یو مخکښ لامل دی.
د روغتیا نړیوال سازمان د شمېرو له مخې په ۲۰۲۴ میلادي کال کې له ۹۳۰۰ څخه زیاتې د شري ناروغۍ پېښې په هېواد کې ثبت شوې وې. د روان میلادي کال تر اګست میاشتې پورې ۸۵۰۰ نورې پېښې هم پرې ور زیاتې شوې، چې پرې اخته کسان یې ۹۲ سلنه له لسو کلونو کم عمره ماشومان دي.
