په افغانستان کې د ملګرو ملتونو د ماشومانو د ملاتړ صندوق (یونیسف) استازي ډاکتر تاج الدین اویواله ویلي، په افغانستان کې بېوزلي، جګړې، اقلیمي ټکانونه او د مرستو کموالی له ماشومانو راتلونکې اخلي.
رخشانه: هغه نن (پنشنبې د لړم ۲۹ مه، د ماشومانو د نړیوالې ورځې سره سم په خپله اېکس پاڼه لیکلي «د ماشومانو حقونه یوازې یوه کلمه نه ده.»
په افغانستان کې د یونسف استازي ویلي، د ژوند ژغورنې خدماتو لپاره د نورو ستونزو تر څنګ د بودیجې شدید کموالی له ماشومانو د هغوی راتلونکې اخلي.
هغه دې خنډونو ته په اشارې ویلي «نور بس دی» او باید د اقداماتو او پانګونې له لارې د ماشومانو ملاتړ باید وشي.
یونیسف هم د یوې اعلامیې په خپرولو سره لیکلي، چې په ماشومتوب کې پانګونه د هغوی د هوساینې او د ټولو لپاره د فرصتونو رامنځ ته کول د هغوی لپاره خورا مهم دي.
د هېواد پخواني ولسمشر حامد کرزي هم د دې ورځې په مناسبت په خپله اېکس پاڼه لیکلي، چې ماشومان د هېواد او ټولنې د راتلونکې په توګه له ټولو زیات رسېدنې او پاملرنې ته اړتیا لري.
هغه د ماشومانو پر زده کړو د ټينګار تر څنګ لیکلي «د هېواد پرمختګ او بیارغونه او په نړیوالو ډګرونو کې ځلېدل» د «پراخه زده کړو، تخصص او وړ مهارت» ته اړتیا لري.
کرزي یو ځل بیا د نجونو پر مخ د ښوونځیو او پوهنتونو دروازو پرانستو پر اړتیا ټينګار کړی ویلي یې دي، «د ټولو لپاره د زده کړو او تحصیل فرصت برابرول، د هېواد د پرمختګ او هوساینې لپاره لار پرانیزي.»
