د افغانستان د خبریالانو مرکز (AFJC) اعلان کړی، چې پکتیا ولایت کې هم د ساه کښو په انځور خپرولو بندیز لګېدلی دی.
رخشانه: دغه مرکز نن (یکشنبې د لیندۍ ۲ مه) په یوه اعلامیه کې لیکلي، دغه محدودیتونه د پکتیا ولایت د سیمه ییزه مسوولینو له خوا لګول شوي دي.
اعلامیه کې راغلي، پکتیا درویشتم ولایت دی، چې په کې د ساه کښو په انځور خپرولو په رسمي ډول بندیز اعلان او پلی کېږي.
طالبانو په رسنیو کې د ساه کښو په انځور خپرولو بندیز د هېواد په ۲۲ ولایتونو کې لګولی دی، دغه محدودیت په کندهار، تخار، بادغیس، هلمند، ننګرهار، نورستان، فراه، نیمروز، بدخشان، بغلان، جوزجان، زابل، پروان، کندوز، بامیان، دایکنډي، فاریاب، پنجشېر، لغمان، سرپل، بلخ، هرات او پکتیا ولایتونو کې په رسمي ټول د طالبانو له خوا لګول شوی دی.
پکتیا کې سیمه ییز طالب چارواکو د دې ډلې له دولتي ادارو غوښتي، چې له رسنیو سره د تصویري مرکو کولو ډډه وکړي او پر ځای یې راپورونه په غږیز یا لیکلې بڼه وړاندې کړي.
دغه مخنیوي د باختر دولتي آژانس د انځوریزه استازولۍ او چاپي خپرونو او په خواله رسنیو د سیمه ییزو، نن، ژوند، هوا، پټان غږ او څمکني غږ راډیوګانو خپرونې هم تر اغېز لاندې راوستې دي.
د افغانستان د خبریالانو مرکز پکتیا ولایت کې د ساه کښو په انځور خپرولو لګېدلی بندیز غندلی وايي، دغه محدودیت به اطلاعاتو ته د خلکو لاسرسی تر دې هم محدود او سخت کړي.
دغه مرکز له طالبانو غوښتي، چې د دې امر په بیا کتنې او لغوه کېدو سره د رسنیو لپاره د آزادې او له وېرې پرته فضا په رامنځ ته کولو کې وړ اسانتیاوې برابرې کړي.
د بیان د آزادۍ مرکز هم دوه ورځې وړاندې د تلوېزیون د نړیوالې ورځې په مناسب لیکلي وو، چې د طالبانو تر واک لاندې افغانستان کې د تلوېزیونونو وروستۍ سلګۍ دي.
د بیان آزادۍ مرکز په اعلامیه کې راغلي، طالبانو په تېرو څلورو کلونو کې د تلوېزیونونو د فعالیتونو په اړه ۲۳ امرونه صادر کړي دي او په تېر یوه کال کې لږ تر لږه ۱۵ تلوېزیونونه د طالبانو په نېغه لارښوونه تړل شوي دي.
طالبانو په تېرو له څلورو کلونو زیاته موده کې د رسنیو او رسنیو د فعالیتونو په وړاندې د سختو محدودیتونو په لګولو سره، د لسګونو، غږیزو، تصویري او چاپي رسنیو د بندېدو سبب شوي او څو تنه خبریالان، کارکوونکي او رسنیو د فعالان یې نیولي دي.
