کندهار کې سیمه ییز طالب چارواکي وايي، د دې ولایت د میوند ولسوالۍ د استوګنې په یوه کور کې د چاودنې له امله دوه تنه وژل شوي او د ښځو او ماشومانو په ګډون اووه تنه نور ټپیان شوي دي.
رخشانه: کندهار کې د طالبانو د امنیه قوماندانۍ ویاند اسدالله جمشېد سیمه ییزه رسنیو ته ویلي، دغه چاودنه د یکشنبې شپه (د لیندۍ ۲ مه) د میوند ولسوالۍ د کلا شاه میر سیمې په بادزي کلي کې رامنځ ته شوې ده.
د هغه په وینا، چاودېدونکو توکو د یوه کور د بخارۍ د ننه چاودنه کړې، چې په پایله کې یې د یادې کورنۍ دوه غړي وژل شوي او اووه نور ټپیان شوي دي.
د دې پېښې په ټپیانو کې ښځې او ماشومان هم شامل دي.
کندهار کې د طالبانو د امنیه قوماندانۍ ویاند زیاته کړې، د پېښې ټپيان د درملنې په موخه د کندهار ښار میرویس روغتون ته لېږدول شوي دي.
هغه د ټپیانو د روغتیايي حالت په اړه څه نه دي ویلي.
کندهار کې د طالبانو د امنیه قوماندانۍ ویاند د دې پېښې رامنځ ته کېدل له چاودېدونکو توکو «د ماشومانو ناخبري» په ګوته کړه.
هغه نه ده، مشخصه کړې، چې چاودېدونکي توکي د چا له خوا د بخارۍ د ننه اېښودل شوي دي.
