د طالبانو د عامې روغتیا وزارت اعلان کړی، چې د پولیو یا د ماشوم د ګوزڼ واکسین د پلي کولو کمپاین یې د هېواد په ۱۷ ولایتونو کې پیل کړی دی.
رخشانه: دغه وزارت نن سهار (دوشنبې د لیندۍ ۳ مه) په یوه خبرپاڼه کې لیکلي، په دې پړاو کې به کابو له پنځو کلونو کم عمره ۷.۴ میلیونه ماشومان واکسین تر لاسه کړي.
د طالبانو د عامې روغتیا وزارت په خبرپاڼه کې راغلي، دغه کمپاین به د هېواد په اوو زونونو کې د روانې اوونۍ تر پنشنبې ورځې پورې دوام ولري.
د روان میلادي کال د پولیو واکسین پلي کولو په څلورم پړاو کې به په کندهار، هلمند، فراه، هرات، ارزګان، زابل، غزني، پکتیا، پکتیکا، خوست، کابل، لغمان، ننګرهار، کونړ، نورستان، کندوز او بلخ ولایتونو کې ۷.۴ میلیونه ماشومان واکسین تر لاسه کړي.
له «پولیو د خالي افغانستان» پاڼې هم نن اعلان کړی دی، چې د پولیو واکسین د پلي کېدو نوی پړاو د هېواد په بېلا بېلو ولایتونو کې پیل شوی دی.
دغه پاڼې نه ده معلومه کړې، چې د دې کمپاین په ترڅ کې به څومره شمېر ماشومان د پولیو واکسین تر لاسه کړي.
دغې پاڼې له کورنیو غوښتي، چې خپل تر پنځو کلونو کم عمره ماشومان واکسین کړي.
روان میلادي کال په افغانستان کې د ماشومانو د ګوزڼ یا پولیو پنځه مثبتې پېښې ثبت شوې دي.
یوه پېښه په ارزګان، درې پېښې په هلمند، یوه پېښه په بادغیس، یوه پېښه په نورستان، دوه پېښې په پکیتکا او یوه پېښه هم په فراه کې ثبت شوې ده.
افغانستان او پاکستان په نړۍ کې یوازیني هېوادونه دي، چې تر اوسه د پولیو ویروس په لمنځه وړلو نه دي بریالي شوي.
