د ښځو اعتراضي «د افغان ښځو د آزادۍ څراغ، د امید کړکۍ او د افغان ښځو د غږ» غورځنګونو د ښځو په وړاندې د تاوتریخوالي له منځه وړلو نړیوالې ورځې په مناسبت، د طالبانو تر واک لاندې افغانستان کې د ښځو په وړاندې د تاوتریخوالي پای ته رسولو لپاره د بېړني اقدام غوښتنه کړې ده.
رخشانه: دغه درې اعتراضي غورځنګونو د یوه اعتراضي پروګرام په جوړولو او بېلا بېلو بیانیو په ورکولو سره، په افغانستان کې د ښځو او نجونو په وړاندې د طالبانو له خوا لګول شوي محدودیتونه غندلي دي.
د افغان ښځو د آزادۍ څراغ اعتراضي غورځنګ په خپله بیانیه کې لیکلي، له زده کړو محرومیت، د له کاره مخنیوی، سیستماتیک تاوتریخوالی، ځورول، ربړونه او د ښځو په وړاندې جوړ شوی تبعیض په ورځني واقعیت اوښتی دی.
د دغه اعتراضي غورځنګ غړو ویلي، د افغان ښځو په وړاندې جنسیتي توپیر، یو انساني بحران او د بشریت په وړاندې جنایت دی او نړیواله ټولنه نباید د هغه پر وړاندې چوپ شي.
هغوی د افغان ښځو په وړاندې د تاوتریخوالي او تبعیض د پای ته رسولو لپاره د نړیوال ګټور ملاتړ او فشار غوښتنه کړې ده.
د «امید کړکۍ» ښځو غورځنګ هم په یوه بیانیه کې لیکلي، چې افغان ښځې د طالبانو د څلور کلنۍ واکمنۍ لاندې د تاوتریخوالي له بېلا بېلو ډولو، ځپلو او سیستمایتک تبعیض سره مخ دي.
د دې اعتراضي غورځنګ په بیانیه کې راغلي «طالبانو د ښځو په وړاندې تاوتریخوالی په یوه هدف لرونکي او سازمان شوي سیاست اړولی، چې ښځې یې له زده کړو، کار، په ټولنه کې له شتون او بنسټیزو حقونو بې برخې کړې دي.»
معترضو ښځو په هېواد کې د ښځو او نجونو پر حقونو او اساسي خپلواکیو د طالبانو له لوري پراخو محدودیتونو لګېدو ته په اشارې ویلي چې « کورنۍ تاوتریخوالی [په دې څلورو] کلونو کې زیات شوی او د ملاتړ او حق غوښتنې کمپاینونه او کړنلارې لغوه شوې دي.»
هغوی د طالبانو تاوتریخوالی د بشریت پر وړاندې جنایت او جنسیتي توپیر بللی او له نړیوالې ټولنې یې غوښتني، چې له ښځو او د هغوی د حقونو د مدافعینو ملاتړ پیاوړی کړي او طالبان د ښځو د حقونو د سرغړاوي په پار ځواب ویوونکي کړي.
د افغان ښځو غږ غورځنګ هم په بیانیه کې لیکلي دي چې «د طالبانو تر واک لاندې افغانستان کې د ښځو په وړاندې تاوتریخوالی نه یوازې پای ته نه دی رسېدلی، بلکې په تېرو څلورو کلونو کې په پراخه، سازمان شوې او بې ځنډه ډول یې دوام موندلی دی.»
بیانیه کې راوړل شوي، چې د ښځو په وړاندې د طالبانو محدودیتونه د انساني کرامت، خپلواکۍ، شخصي خوندیتوب، زده کړو د حق، جنسیتي برابرۍ د حق ښکاره سرغړاوی او د ښځو په وړاندې د تبعیض او سیستماتیک تاوتریخوالي ښکاره بېلګه ګڼل کېږي.
د دغه اعتراضي غورځنګ غړو له نړیوالې ټولنې، په ځانګړې توګه له ملګرو ملتونو، اروپايي ټولنې، دولتونو او د بشر حقونو نړیوالو بنسټونو غوښتي، چې په افغانستان کې د ښځو د بشري حقونو په وړاندې د پراخ سرغړاوي په پار طالبان ځواب ویوونکي او د نړیوال عدالت تر پلټنو لاندې ونیسي.
هغوی د طالبانو نظام «نامشروع» بللی ویلي یې دي، چې د دې ډلې حکومت، د تبعیض، حذف او د وګړو په ځانګړې توګه د ښځو د اساسي حقونو په سرغړاوي ولاړ دی.
معترضو شځو د یوه مشروع، ځواب ویوونکي او ټولګډونه، چې د افغانستان د خلکو ریښتینی استازی وي او د ښځو حقونه د نړیوالو معیارونو سره سم تضمین کړي، د یوه حکومتي جوړښت د رامنځ ته کېدو غوښتنه کړې ده.
