بامیانو کې خبر لرونکې سرچینې تاییدوي، چې په دغه ولایت کې سیمه ییزې نسیم رډیو، له درې میاشتې او ۱۴ ورځو ځنډ وروسته بېرته خپلې خپرونې له سره پیل کړې دي.
رخشانه: د نسیم راډیو یوه پخواني مسوول رخشانې رسنۍ ته تایید کړې، چې دغه غږیزې رسنۍ نن (دوشنبې د لیندۍ ۴ مه) بېرته خپل فعالیت پیل کړی دی.
د دې سرچینې په وینا، نسیم سیمه ییزه راډیو یوازې په بامیان ولایت کې خپرونې لري او په دایکنډي ولایت کې یې لا هم خپرونې بندې دي.
بامیانو کې د طالبانو د والي رسنیز دفتر هم په دې ولایت کې د نسیم راډیو د «بشپړو رسنیزو اصولو، ارزښتونو او پالیسیو په رعایت کولو» سره د خپرونو د بیا پیل خبر ورکړی دی.
نسیم سیمه ییزه راډیو د روان لمریز کال د زمري میاشتې په ۲۰ مه د هغې د مدیر مسوول او دوه خبریالانو له بیا ځلي نیول کېدو وروسته تړل شوې وه.
د طالبانو استخباراتي ځواکونو د سږ کال په اوړي کې، په دایکنډي ولایت کې د دې سیمه ییزې راډیو مسوول مدیر سلطان علي جوادي او دوه خبریالان مجتبی قاسمي او سیف الله رضايي او د هغو د دفتر توکي ونیول.
که څه هم دا درې خبریالان له څو ساعته نیول کېدو وروسته د طالبانو له بنده خوشي شول، خو د هغوی د نیولو دلیل نه دی مشخص شوی.
دغه درې سیمه ییز خبریالان د ۱۴۰۲ کال په اوړي کې هم د طالبانو استخباراتي ځواکونو په دایکنډي ولایت کې نیولي او کاري توکي یې ترې ضبط کړي وو.
طالبانو پر هېواد له څلورو کلونو په څه زیاته واکمنۍ کې په رسنیو او رسنیزو فعالیتونو سخت محدودیتونه لګولي دي.
د دې محدودیتونو د پلي کېدو سره د هېواد په ګوټ ګوټ کې ګڼ شمېر خبریالان د رسنیز فعالیت پرېښودو، لسګونه غږیزې، انځوري او چاپي رسنۍ تړل کېدو ته اړ شوې دي.
