د ملګرو ملتونو سرمنشي آنتونیو ګوترش د ښځو په وړاندې د تاوتریخوالي له منځه وړلو نړیوالې ورځې په مناسبت ویلي، د ښځو او نجونو په وړاندې تاوتریخوالی یوه نړیواله بلا ده، چې په ډیجیټل دوره کې د ټیکنالوژۍ لاسرسي او ګړندیتوب سره لا زیات شوی دی.
رخشانه: ګوترش نن ماسپښين (دوشنبې د لیندۍ ۴ مه) په خپله اېکس پاڼه د یوې ویډیو په خپرولو سره لیکلي چې «موږ اجازه نه شو ورکولی چې ډیجیټل فضاوې په نورو هغه ځایونو واوړي، چې ښځې او نجونې په کې خوندي نه وي.»
د ملګرو ملتونو سرمنشي د مجازي فضا د خوندیتوب غوښتنه کړې وايي، هېوادونه دې مجازي تاوتریخوالي جرم وګڼي.
هغه ټينګار کړی، چې د ټيکنالوژۍ شرکتونه باید ډاډ تر لاسه کړي، چې پلټفارمونه یې خوندي او ځواب ویوونکي دي.
په افغانستان کې د اروپايي ټولنې دفتر(EU) هم نن په خپله اېکس پاڼه د یوه پوسټ په خپرولو سره لیکلي، چې د ښځو په وړاندې د تاوتریخوالي له منځه وړلو کمپاین سره به یو ځای شي.
دغه دفتر لیکلي، چې د افغان ښځو تر څنګ ولاړ دی او د «ننګونو په وړاندې د دوی د عالي درېدو او د یو سوکاله هېواد د جوړولو لپاره د دوی د وړتیا ستاینه کوي.»
د ملګرو ملتونو د ښځو په وړاندې د تاوتریخوالي له منځه وړلو د سږ کال شعار «د ښځو او نجونو په وړاندې د ډیجیټل تاوتریخوالي پای ته رسول» دی.
په افغانستان کې یوناما او د ملګرو ملتونو د ښځو څانګې نن سهار په یوه اعلامیه کې لیکلي، چې په تېرو څه کم دوه کلونو کې په افغانستان کې د ښځو او نجونو په وړاندې تاوتریخوالی څلوېښت سلنه زیات شوی دی.
د دې دواړو بنسټونو په اعلامیه کې راغلي «په تېرو څه کم دوه کلونو کې یو شمېر ښځې او نجونې چې د لوړ تاوتریخوالي په درشل کې دي، څلوېښت سلنه زیاتوالی کړی او شاوخوا ۱۴.۲ میلیونه ښځې دا مهال خوندیتوب او مرستې ته اړتیا لري.»
ملګرو ملتونو ټینګار کړی، چې ډیجټلي اړیکې د ګڼ شمېر افغان ښځو لپاره په یوه اړین امر اوښتې ده او هغوی له دې ګزینې د تاوتریخوالي په واندې د خوندیتوب خدماتو تر لاسه کولو لپاره کار اخلي.
