د استرالیا د پارلمان غړي ریچارد مارلز ویلي، د دغه هېواد پارلمان د طالبانو تر ولکې لاندې افغانستان کې د هزاره ګانو ځورول او ورسره تبعیض په رسمي ډول په رسمیت وپېژاند.
رخشانه: مارلز نن (چهارشنبې د لیندۍ ۵ مه) په خپله فسبوک پاڼه د یوه پوسټ په خپرولو سره لیکلي، چې دغه پرېکړه د روانې اوونۍ د دوشنبې په ورځ د پارلمان له لوري شوې ده.
هغه لیکلي: «زموږ پارلمان [استرالیا] هغه ځورول او کړاو چې هغوی [هزارګان] د طالبانو تر واک لاندې افغانستان کې ورسره مخ دي، په رسمیت وپېژاند.»
ښاغلي مارلز ویلي، هزاره ټولنه د استرالیا هېواد په ګوټ ګوټ کې فعاله ونډه لري.
په استرالیا کې یوې افغان کډوالې ستاره محمدي هم په خپله فسبوک پاڼه د یو پوسټ په خپرولو سره د طالبانو تر واک لاندې افغانستان کې د هزاره ګانو د ځورونې او کړاو د په رسمیت پېژندلو خبر ورکړی دی.
هغې لیکلي دي: «د ۲۰۲۵ کال د نوامبر په ۲۴ مه د دوشنبې په ورځ د استرالیا پارلمان د استازو جرګې یوه مهمه طرحه تصویب کړه. دا طرحه په افغانستان کې د هزاره ګانو، مذهبي لږکیو، نجونو او ښځو په وړاندې د دوامداره ظلم، ځورونې او تبعیض په اړه ده.»
محمدي د ۲۰۲۱ په اګست کې د طالبانو بیا واک ته په رسېدو او د «خپلواکو بنسټونو، ملګرو ملتونو د کارپوهانو او بشري حقونو د سازمانونو» راپور ته په اشارې لیکلي دي، چې هزاره وګړي، له هدفي وژنو، په زور کډوالۍ، تبعیض او کلتوري حذفولو سره مخ دي. هزاره مېرمنې، د قوم، مذهب او ښځمنتوب په خاطر څو برابره زیات زیان ویني.
نوموړې پر دوام لیکلي چې هغوی د طالبانو تر واک لاندې افغانستان کې له هزاره ګانو سره د ځورونې، کړاو او تبیعض د په رسمیت پېژندلو طرحه چمتو کړې او د استرالیا د کورنیو او بهرنیو چارو وزارتونو تر بیا کتنې او د ګوندونو د مشرانو تر تایید وروسته د دغه هېواد پارلمان ته وړاندې کړای شوې ده.
هغوی په دې خپله طرحه کې د افغانستان د ټولو لږکیو، ښځو او نجونو چې «د افغانستان هېڅ ځای له تاوتریخوالي خوندي نه دي» د ملاتړ غوښتنه کړې ده.
د ویلو ده، چې هزاره ګان په افغانستان کې له سیستماتیک او جوړ شوي تبعیض سره له کلونو راهیسې مخ دي. د طالبانو په واکمنۍ کې دغه وضعیت لا بد شوی دی.
