د ایټالیا پارلمان داسې یوه طرحه تصویب کړې، چې پر بنسټ یې د ښځې وژل د یوه جرم په توګه په رسمیت وپېژاند او د هغو د لپاره یې د عمر قید سزا ټاکلې ده.
رخشانه: دغه لایحه تېره ورځ (سه شنبې د لیندۍ ۴ مه) د ښځو په وړاندې د تاوتریخوالي مخنیوي له نړیوالې ورځې سره سم د ایټالیا پارلمان د ټولو غړو له خوا تصویب شوه.
یاده لایحه تر دې مخکې د روان میلادي کال په جنورۍ میاشت کې د دې هېواد د مشرانو جرګې له خوا تصویب شوې وه او تېره ورځ د ۲۷۳ موافقو او له مخالفې رایې پرته د پارلمان د غړو له خوا تصویب شوه.
د دې لایحې سره سم د هغو اعمالو لپاره د عمر قید سزا ټاکلې، چې د «تبعیض، کرکې یا تاوتریخوالي» او یا نورو دلایلو له آمله د یوې ښځې د وژلو په نیت تر سره شوي وي.
د ایټالیا لومړۍ وزیرې جورجیا ملوني د دې لایحې له تصویب څخه هرکلی کړی او دا اقدام یې د «د هرې ښخې له کرامت او خپلواکۍ څخه د دفاع» لپاره وسیله بللې ده.
د ایټالیا د ملي شمېرنې موسسې تېره ورځ اعلان کړی وو چې، په ۲۰۲۴ کال کې په دې هېواد کې له ۳۷۲ ثبت شویو وژنو څخه ۱۱۶ پې یې په ښځو او نجونو پورې اړوندې دي. د دې موسسې د شمېرو له مخې، په ۹۲.۲ سلنه پېښو کې نارینه قاتلان وو.
ملګرو ملتونو تېره ورځ د ښځو په وړاندې د تاوتریخوالي له منځه وړلو په نړیواله ورځ اعلان وکړ، چې تېر یو کال د نړۍ په ګوټ ګوټ کې شاوخوا ۵۰ زره ښځې او نجونې د خپل ژوند د شریکانو یا د کورنۍ د غړو له خوا خپل ژوند له لاسه ورکړی دی.
