په افغانستان کې د ملګرو ملتونو سیاسي استازولۍ (یوناما) ویلي، په خوست او کونړ ولایتونو د پاکستان د پوځ د یکشنبې شپې په هوايي بریدونو کې د ښځو او ماشومانو په ګډون لږ تر لږه لس تنه وژل شوي دي.
رخشانه: یوناما تېره ورځ ناوخته (سه شنبې د لیندۍ ۴ مه) په خپله اېکس پاڼه د یوه پوسټ په خپرولو سره لیکلي، د دې بریدونو ډېری قربانیان ښځې او ماشومان دي.
د پاکستان پوځ د یکشنبې په شپه شاوخوا ۱۲:۰۰ بجې په خوست، پکتیکا او کونړ ولایتونو هوایي بریدونه تر سره کړل.
یوناما یو ځل بیا د ملکي وګړو د خوندیتوب او هغوی ته د زیان رسولو څخه د مخنیوي نړیوالو قوانینو ته د درناوي غوښتنه کړې ده.
د افغانستان د بشري حقونو لپاره د ملګرو ملتونو ځانګړي راپور ورکوونکي ریچارد بنټ هم د پاکستان له دولت نه غوښتي، چې نړیوالو قوانینو او د ملکي وګړو خوندیتوب ته درناوی وکړي.
هغه زیاته کړې «تاوتریخوالی» حل لار نه ده او د پاکستان دولت او طالبان باید ستونزې د «ښځو په ګډون» د مذاکراتو له لارې هوارې کړي.
طالبانو تېره ورځ اعلان وکړ، چې په خوست، پکتیکا او کونړ ولایتونو د پاکستاني پوځ په هوايي بریدونو کې د ۹ ماشومانو او یوې ښځې په ګډون ۱۲ تنه په خوست ولایت کې وژل شوي دي.
د طالبانو او پاکستاني ځواکونو تر منځ په دې وروستیو کې شخړې زیاتې شوې او دواړه لوري فرضي کرښې ته څېرمه سره نښتې هم کړې دي.
