د ښځو پر وړاندې د تاوتریخوالي له منځه وړلو نړیوالې ورځې له ۱۶ ورځني کمپاین سره هممهاله، د ملګرو ملتونو علمي -ښوونیز سازمان (یونسکو) وايي، د ښځینه خبریالانو پر وړاندې انلاین تاوتریخوالی په نندارپاڼه پای ته نه رسېږي.
رخشانه: دغه بنسټ نن سهار (یکشنبې د لیندۍ ۹ مه) په خپله اېکس پاڼه د یوې ویډیو په خپرولو سره لیکلي، کله چې پر یوې ښځینه خبریالې برید کېږي، د هغې غږ په نښه کېږي.
د ملګرو ملتونو علمي- ښوونیز سازمان زیاته کړې، پر ښځینه خبریالانو په برید سره له موږ [وګړو] هم د پوهېدو حق» اخیستل کېږي.
یونسکو ټینګار کړی، چې له ښځینه خبریالانو د خوندیتوب په پار یې، د حساب ورکولو لپاره د لارو چارو د پیاوړتیا او د ټولو لپاره د خوندي ډیجیټل ځایونو د ډاډمنولو کار کوي.
په افغانستان کې ښځینه خبریالانې پر رسنیو او رسنیزو فعالیتونو د طالبانو د سختو محدودیتونو سربېره، په ډیجیټل فضا کې له آنلاین تاوتریخوالي سره هم مخ دي.
څه موده وړاندې د افغانستان له رسنیو د ملاتړ سازمان په یوه راپور کې لیکلي وو، چې د طالبانو تر واک لاندې افغانستان کې ۹۲ سلنه ښځینه خبریالانې د خپلو راپورونو بدلون یا سانسور ته اړ شوې دي.
په هېواد کې ښځینه خبریالانو «سانسور، له سړیو سره د مرکو مخنیوی، د محرم اړتیا، اجباري جامې، څار او پر توکو لاسرسي ته محدودیت» پر رسنیو له لګول شویو محدودیتونو بللي دي.
د افغانستان له رسنیو د ملاتړ بنسټ ویلي وو، چې ۵۵ سلنه ښځینه خبریالانې د خپلې دندې له کبله د ځینو کسانو له خوا ګواښ شوې دي.
طالبانو د ښځې غږ ستر بللی او په همدې دلیل یې څو ځلې په خبري ناسو کې د ښځینه خبریالانو غږ او انځور پرې کړی دی.
دغه ډله په رسنیو او رسنیزو فعالیتونو د سختو محدودیتونو په لګولو سره په هېواد کې د لسګونو رسنیو د تړلو او د یو شمېر خبریالانو او رسنیزو کارکوونکو د بې کارۍ لامل شوې او دغه راز یې ګڼ شمېر خبریالان، رسنیز کارکوونکي او د رسنیو فعالان نیولي او بندیان کړي دي.
