افغانستان کې د اروپايي ټولنې دفتر د ښځو په وړاندې د تاوتریخوالي له منځه وړلو نړیوالې ورځې د ۱۶ ورځني کمپاین په ترڅ کې ویلي، دوی د روغتیايي متخصیصیونو په توګه د ښځو له زده کړو ملاتړ کوي.
رخشانه: دغه بنسټ نن (دوشنبې د لیندۍ ۱۱ مه) په خپله اېکس پاڼه د یو پوسټ په خپرولو سره لیکلي چې «د ټولو لپاره د خوندي او لاسرسي وړ روغتیايي خدماتونو خوندیتوب خورا مهم دی.»
د اروپايي ټولنې دفتر لیکلي، په افغانستان کې د روغتیايي خدماتو له وړاندې کولو ملاتړ کوي، تر څو ښځې، نجونې او میندې له حیاتي څارنو برخمنې شي.
دغه بنسټ له دې وړاندې هم د ښځو په وړاندې د تاوتریخوالي له منځه وړلو نړیوالې ورځې د ۱۶ ورځني کمپاین په ترڅ کې، په افغانستان کې د ښځو او نجونو د زده کړو پر ملاتړ ټینګار کړی وو.
طالبانو پر ښځو او نجونو د نورو سختو محدودیتونو سربېره، په پوهنتونو کې د هغوی پر تحصیل، په ځانګړې توګه د طب په څانګه کې هم پر زده کړو بندیز لګولی دی. دغه محدودیتونو د هېواد په روغتیايي برخه نېغ اغېز کړی دی.
دغو محدودیتونو روغتیايي خدماتو ته لاسرسي تر پخوا ډېر محدود کړی او دا به د عمومي روغتیا، په ځانګړې توګه د میندو او ماشومانو لپاره ناوړه پایلې ولري.
ملګرو ملتونو په وار وار د طالبانو تر واک لاندې افغانستان کې د ښځینه روغتیايي کادرونو له کمښته خبرداری ورکړی او ویلي یې دي، دغې ډلې په پوهنتونونو کې د ښځو پر تحصیل په محدودیت لګولو سره د هېواد روغتیايي سکتور فلج کړی دی.
