د طالبانو سترې محکمې په یوه خبرپاڼه کې لیکلي، چې یو تن په خوست ولایت کې د خلکو په وړاندې اعدام شوی دی.
رخشانه: دغه کس نن له ماسپښین مخکې (سه شنبې د لیندۍ ۱۲ مه) د خوست ولایت مرکز کې اعدام شوی دی.
د طالبانو د سترې محکمې په خبرپاڼه کې له دې کس نه د «منګل» په نوم یادونه شوې او راغلي، چې د پکتیا ولایت د سیدکرم ولسوالۍ د «سجنک» د سیمې اصلي اوسېدونکی او دا مهال د خوست ولایت د علي شېر ولسوالۍ د کوز ابوخاني په سیمه کې اوسېده.
د خبرپاڼې له مخې، منګل د خوست ولایت د علي شېر ولسوالۍ د «کوز ابوخاني» سیمې د اوسېدونکي عبدالرحمن د قصدي قتل په قضیه کې نیول شوی او د دې ډلې په درې واړه محکمو (ابتدایه، مرافعه او تمیز» کې په اعدام محکوم شوی وو.
د دې کس د اعدام حکم د طالبانو د مشر ملا هبت الله اخوندزاده تر تایید وروسته تر سره شوی دی.
د افغانستان د بشري حقونو لپاره د ملګرو ملتونو ځانګړي راپورورکوونکي ریچارد بنسټ نن سهار په خپله اېکس پاڼه د یو پوسټ په خپرولو سره په خوست ولایت کې د یو تن د اعدامېدو خبر ورکړی دی.
هغه د خلکو په وړاندې د افرادو اعدامول، غیرانساني، ظالمانه سزا او د نړیوالو قوانینو خلاف عمل بللی او د طالبانو له لوري یې د دې ډول سزاو د درېدو غوښتنه کړې ده.
خوست کې سیمه ییزه طالب چارواکو هم پرون د دې کس د اعدام حکم د پلي کېدو خبر ورکړی وو او له خلکو یې غوښتي، چې نندارې ته یې د دغه ولایت د مرکز خوست ښار سپورتي لوبغالي ته ورشي.
دا په افغانستان د دې ډلې تر بیا واکمنېدو وروسته دوولسم کس دی، چې د طالبانو له لوري د خلکو په وړاندې اعدامېږي.
