په افغانستان کې د ملګرو ملتونو سیاسي استازولۍ (یوناما) ویلي، په افغانستان کې کابو ۱.۵ میلیونه وګړي له جدي معلولیت سره ژوند کوي او ډېری د دغه معلولیتونو د څو لسیزو جګړو پایله ده.
رخشانه: یوناما نن (چهارشنبې د لیندۍ ۱۲ مه) د معلولیت لروونکو کسانو د نړیوالې ورځې سره سم پر خپله فسبوک پاڼه د یوې اعلامیې په خپرولو سره لیکلي، ماشومان د جګړې له امله د معلولیت تر ټولو ډېر درد پر غاړه وړي.
دغه بنسټ زیاته کړې: «د معلولیت لرونکو کسانو په دې نړیواله ورځ، موږ د هغو له زړورتیا هرکلی کوو او د ټولو لپاره د یوه ټول ګډونه، عادلانه او تل پاتې افغانستان غوښتونکي یو.»
ملګرو ملتونو هم د معلولیت لرونکو کسانو د نړیوالې ورځې په مناسبت په یوه اعلامیه کې لیکلي دي، معلولیت لرونکي کسان د افغانستان ټولینز جوړښت نه بېلېدونکې برخه ده.
د دې بنسټ په اعلامیه کې راغلي دي «د معلولیت لرونکو کسانو غوښتنې، برخو او حقونو ته باید درناوی وشي. معلولیت لروونکي کسان نه یوازې د ګټې وړ دي، بلکې، په ټولنیزو، کلتوري او اقتصادي برخو کې هم د پرمختګ عامل دي.»
ملګرو ملتونو ټینګار کړی، چې د لسیزو جګړو، ډلیزه بې ځایه کېدو، وچکالۍ او کمزورو روغتیايی او اقتصادي سیستمونو په ټول هېواد کې د معلولیت په لوړې کچې کې رول درلود.
د دې بنسټ د شمېرو له مخې، په افغانستان کې ۶.۲۴ سلنه معلولیت لرونکي کسان، له سپک معلولیت، ۴۰ سلنه له منځني او ۹.۱۳ سلنه د معلولیت له شدید ډول سره ژوند کوي.
ملګرو ملتونو ټینګار کړی، چې «دغه شمېرې موږ دې ته چمتو کوي، تر څو دې ستونزې ته د رسېدنې په پار په جدیت او ژمنتیا سره عمل وکړو. د معلولیت لرونکو کسانو سره نه باید د یوې فرعي موضوع په توګه چلند وشي، هغوی باید د هڅو په ټولو پړاونو په ځانګړې توګه په پلان جوړونې، پرېکړو کولو او خدماتو وړاندې کولو کې ځای ولري.
دغه بنسټ زیاته کړې، چې د معلولیت لرونکو کسانو د ګډون ستراتېژۍ پلي کولو ته دوام ورکوي او په افغانستان کې د معلولیت لروونکو کسانو د ټولو حقونو د ملاتړ لپاره خپلې ژمنې بیا تازه کوي.
ملګرو ملتونو یادونه کړې «د ژوند په ټولو چارو کې د دې کسانو ګډول ټولنې ځواکمنې کړې، استقامت یې زیات کړی دی د افغانستان د ټولو وګړو لپاره یې د عادلانه راتلونکې لپاره لار هواروي.»
