افغانستان کې د اروپايي ټولنې دفتر وايي، په افغانستان کې ښځې او نجونې د بېوزلۍ او اساسي ژوندانه د نشتوالي تر ټولو دروند بار زغمي.
رخشانه: یاد دفتر نن (پنشنبې د لیندۍ ۱۳ مه) په خپله اېکس پاڼه د یوه پوسټ په خپرولو سره لیکلي چې د «ښځو د اقتصادي زغمنې له پروژو» ملاتړ کوي.
د اروپايي ټولنې دفتر دغه راز لیکلي، له ښځو اقتصادي ملاتړ د تاوتریخوالي پر وړاندې د هغوی د زیانمنېدو د مخنیوي لپاره کارنده وسیله ده.
دغه دفتر پر دوام د ښځو په وړاندې د تاوتریخوالي پای ته رسولو باندې ټینګار کړی او ویلي یې دي، په افغانستان کې د ښځو په وړاندې ډیجیټلي تاوتریخوالی هم باید پای ته ورسول شي.
طالبانو پر هېواد په خپله څه باندې څلورکلنه واکمنۍ کې د ښځو او نجونو د حقونو او اساسي خپلواکیو پر وړاندې د سختو محدودیتونو په لګولو سره، د دې لامل شوي، چې هغوی له اقتصادي ستونزو تر ټولو زیات زیان وزغمي.
ملګرو ملتونو په وار وار د طالبانو تر واک لاندې افغانستان کې د بېوزلۍ او لوږې په اړه خبرداری ورکړی او ویلي یې دي، د طالبانو محدودیتونو تر ټولو زیات زیان ښځو او نجونو ته رسولی دی.
