طالبانو روانه یوه اوونۍ په سمنګان، جوزجان، کابل، هلمند، بلخ، غزني او پکتیا ولایتونو کې د یوې ښځې په ګډون ۴۱ تنه د بېلا بېلو تورونو له امله، د خلکو په وړاندې په دورو وهلي دي.
رخشانه: دغه کسان «له کوره د تېښتې، اخلاقي فساد، غلا، د نشه کوونکو ګولیو، الګولي مشروباتو او چرسو د پېر، پلور او قاچاق، له واده بهر جنسي اړیکې او پیسو د جعل» په تورونو په دې اوو ولایتونو کې په دورو وهلي دي.
شنبې د (لیندۍ ۸ مه) د یوې ښځې په ګډون درې تنه «له کوره د تېښتې، اخلاقي فساد او غلا» په تورونو په سمنګان او جوزجان ولایتونو کې د خلکو په وړاندې په دورو وهل شوي دي.
د یوې ښځې په ګډون دوه تنه «له کوره د تېښتې او اخلاقي فساد» په تور د سمنګان په روی دوآب ولسوالۍ کې د خلکو په وړاندې له ۲۰ تر ۳۰ دورو وهل شوي دي.
دغه کسان د محکمې د پرېکړې له مخې له یوه تر دوه کلونو په تنفذي بند هم محکوم شوي دي.
یو تن د «غلا» په تور د جوزجان ولایت په خماب ولسوالۍ کې د خلکو په وړاندې ۳۹ دورې و وهل شو او په درې میاشتې تنفذي بند محکوم شو.
یکشنبې د (لیندۍ ۹ مه) ۱۷ تنه د « د نشه کوونکو ګولیو، الګولي مشروباتو او چرسو د پېر، پلور او قاچاق، له واده بهر جنسي اړیکې» په تورونو په کابل او هلمند ولایتونو کې په دورو وهل شوي دي.
۱۵ تنه د « د نشه کوونکو ګولیو، الګولي مشروباتو او چرسو د پېر، پلور او قاچاق،» په تورونو په کابل کې له ۱۰ تر ۲۰ دورو و وهل شول.
دغه کسان کابل کې د طالبانو د نشه يي توکو او مسکراتو د مخنیوي ابتدایه محکمې د پرېکړې پر اساس په اوه کاله او دوې میاشتې او شپږو میاشتو تنفذي بند هم محکوم شوي دي.
دوه تنه «له واده بهر د جنسي اړیکې» په تور د هلمند ولایت په ګرشک او موسی کلا ولسوالیو کې د خلکو پر وړاندې له ۲۰ تر ۳۹ دورو وهل شوي او په شپږ او دوه میاشتو تنفذي بند محکوم شوي دي.
دوشنبې د (لیندۍ ۱۰ مه) دوه تنه «د الکولي مشروباتو د قاچاق او غلا» په تورونو په بلخ او غزني ولایتونو کې د خلکو په وړاندې په دورو وهل شوي دي.
یو تن د «الکولي مشروباتو د قاچاق» په تور په بلخ ولایت کې ۳۹ دورې وهل شوی دی.
معلومه نه ده، چې دغه کس په څومره موده بند محکوم شوی دی.
یو بل تن بیا د «غلا» په تور د غزني په ګیلان ولسوالۍ کې د خلکو په وړاندې ۳۹ دورې وهل شوی او په یو کال او شبږ میاشتې تنفذي بند هم محکوم شوی دی.
چهارشنبې د (لیندۍ ۱۲ مه) یو تن د «الکولي مشروباتو د قاچاق» په تور د بلخ ولایت مرکز مزارشریف ښار کې ۳۹ دورې ووهل شو.
معلومه نه ده، چې دې کس ته څومره موده بند سزا ورکړل شوې ده.
پنشنبې د (لیندۍ ۱۳ مه) ۱۸ تنه د «د نشه کوونکو ګولیو، الکولي مشروباتو د پېر، پلور او قاچاق او پیسو د جعال» په تورونو په کابل او پکتیا ولایتونو کې په دورو وهل شوي دي.
۱۵ تنه د «نشه کوونکو ګولیو او الکولي مشروباتو د پېر، پلور او قاچاق» په تورونو کابل کې له ۱۰ تر ۳۹ دورو وهل شوي دي.
دغه کسان کابل کې د طالبانو د نشه يي توکو او مسکراتو د مخنیوي ابتدایه محکمې له خوا د اوو میاشتو او څلورو کلونو تر منځ موده په تنفذي بند هم محکوم شوي دي.
درې تنه د «پیسو د جعل» په تور د پکتیا ولایت جاني خېل ولسوالۍ کې د خلکو په وړاندې ۲۰ دورې وهل شوي او په شپږ میاشتې تنفذي بند محکوم شول.
