د خبریالانو د خوندیتوب کمېټې (CPJ) په یوه اعلامیه کې له طالبانو غوښتی، چې نیول شوي خبریالان له بنده خوشي کړي.
رخشانه: دغه بنسټ نن (دوشنبې د لیندۍ ۱۷ مه) د بشري حقونو د نړیوالې ورځې په درشل کې لیکلي، د طالبانو بیا واک ته تر رسېدو وروسته، په افغانستان کې د رسنیو خپلواکۍ په شدت سره سقوط کړی دی.
د خبریالانو د خوندیتوب کمېټې ویلي، په تېرو څه باندې څلورو کلونو کې، خبریالان په سیستماتیک ډول د خپل سرو نیونو، له تور یا محکمې پرته اوږدمهاله نیونو، فزیکي تاوتریخوالي او مرګ له ګواښونو سره مخ شوي دي.
دغه بنسټ لیکلي، طالبانو دوه خبریالان مهدي انصاري او حمید فرهادي د افغانستان له خپلواکه رسنیو سره، چې همدا اوس په جلاوطنۍ کې فعالیت کوي، د همکارۍ په تور زنداني کړي دي.
د خبریالانو د خوندیتوب کمېټې د افغانستان د ښځینه خبریالانو په وړاندې له توپیري چلنده ډک محدودیتونو، د انټرنېټ پرېکېدو او د لسګونو رسنیو پر بندېدو اندېښنه ښودلې ده.
دغه رسنیز بنسټ د رسنیو او خبریالانو او رسنیو په وړاندې د طالبانو محدودیتونه د بیان د آزادۍ له بنسټیزه حقونو ښکاره سرغړاوی بللی وايي، دغه محدودیتونه د بشري حقونو له هغې ډلې د رسنیو د خپلواکۍ په اړه، د طالبانو د درناوي له څرګندونو سره په ټکر کې دي.
د خبریالانو د خوندیتوب کمېټې ویلي، په افغانستان کې د خبریالانو د بندي کولو دوام او ځورونې د طالبانو له خوا د اعتدال یا بشري حقونو ته د درناوي هر ډول ادعا کمزورې کوي.
دغه بنسټ له طالبانو غوښتي، چې «خپله کړنلاره اصلاح کړي او د مطبوعاتو د ریښتینۍ خپلواکۍ د پلي کېدو لپاره عملي ګامونه پورته کړي.»
طالبانو په تېرو څه باندې څلورو کلونو کې د خبریالانو او رسنیزو فعالانو د نیونو سربېره، پر رسنیو سخت محدودیتونه لګولي او د لسګونه رسنیو د تړل کېدو لامل شوي دي.
