په افغانستان کې د بشري مرستو د همغږۍ دفتر (اوچا) ویلي، ۲۰۲۶ کال کې به ۲۱.۹ میلیونه تنه، چې د افغانستان د نفوس ۴۵ سلنه جوړوي، بشردوستانه مرستو ته به اړتیا ولري.
رخشانه: دغه بنسټ نن (دوشنبې د لیندۍ ۱۷ مه) د یوې اعلامیې په خپرولو سره ویلي، په افغانستان کې د خوړو خوندیتوب سخت له خرابېدو سره مخ دی او وړاندوینه کېږي، چې راتلونکی کال به ۱۷.۴ میلیونه کسان د خوړو سخت نه خوندیتوب سره مخ شي او کابو ۵.۲ میلیونه کسان به په بېړني پړاو کې ځای ولري.
اوچا لیکلي چې «په هېواد کې بشري وضعیت په ځانګړې توګه د ښځو او نجونو لپاره د خوړو نه خوندیتوب او تکراري ټکانونو، لکه د اقلیمي بدلونونو له امله رامنځ ته شوې وچکالۍ، د کډوالو پراخه راستنېدنه، زلزلې، پرلپسې سېلابونه، د ناروغیو خپرېدل او د سخت خوندیتوب ګواښونو تر اغېزې لاندې دي.»
دغه بنسټ ویلي چې «د خوندیتوب ګواښونه لا هم جدي دي او اټکل کېږي، چې د طالبانو له خوا د ښځو او نجونو په وړاندې د محدودیتونو پلي کولو له امله به زیات شي.»
د اوچا په اعلامیه کې راغلي، چې دا وضعیت د جګړې د چاودېدونکو توکو پاتې شونو، د جنسیت پر بنسټ تاوتریخوالي، د ماشومانو کار او د کم عمره ودونو سره د سیمو پراخه ککړتیا سره یو ځای وضعیت لا پسې خراب کړی دی.
په افغانستان کې د بشري مرستو د همغږۍ دفتر ویلي، په منځنۍ کچه هره میاشت شاوخوا ۵۰ تنه د چاودېدونکو توکو له امله مړه یا ټپیان کېږي.
اوچا ټينګار کړی، چې له ایران او پاکستان څخه د افغان کډوالو پراخه راستنېدنې هم په افغانستان کې بشري اړتیاوې پېچلې کړې دي. د دې بنسټ په وینا، یوازې په ۲۰۲۵ کال کې له ۲.۵۲ میلیونه څخه زیات کسان له ایران او پاکستان څخه راستانه شوي دي.
نړیوالو بنسټونو په وار وار د طالبانو تر واک لاندې افغانستان کې د بشري وضعیت له خرابېدو خبرداری ورکړی او اړمنو ته د رسېدنې غوښتونکي شوي دي.
