د بشري حقونو د مدافعین کمېټې (HRDC) په یوه اعلامیه کې د طالبانو تر واک لاندې افغانستان کې د بشري حقونو د وضعیت د سرغړونو او خبرابېدو خبرداری ورکړی دی.
رخشانه: دغه بنسټ نن (چهارشنبې د لیندۍ ۱۹ مه) د بشري حقونو د نړیوالې ورځې سره سم په خپله اعلامیه کې لیکلي، د افغانستان میلیونونه وګړي، په ځانګړې توګه ښځې او نجونې، مدني فعالان او فکري لږکي له خپلو لومړنیو خپلواکیو او انساني حقونو څخه بې برخې دي.
د بشري حقونو د مدافعینو کمېټې ویلي، د طالبانو تر بیا واکمنېدو وروسته، افغانستان د بشري حقونو د منظمو سرغړونو، جوړښتي جنسیتي توپیر، د مدني خپلواکیو ځپلو او ناوړه چلندو شاهد دی.
دغې کمېټې زیاته کړې، طالبانو په افغانستان کې د کار زده کړو او له ټولنیزو برخو د ښځو د لرې کولو په محدودیتونو، د بیان د آزادۍ او رسنیو په محدودولو، د مدني فعالانو او پخواني دولت د کارکوونکو په نیولو او وژنو سره له بشري حقونو سرغړونې کړې دي.
د بشري حقونو د مدافعینو کمېټې د ملګرو ملتونو د بشري حقونو شورا له خوا په افغانستان کې د طالبانو له لوري د بشري حقونو د سرغړونو او جنګي جرمونو د څېړلو لپاره د خپلواکه پلټونکې او حساب ورکوونکې کړنلارې د جوړلو هرکلی کړی وايي، دا کړنلاره باید په چټکۍ سره بسندویه سرچینې او بشپړ سیاسي ملاتړ ولري.
دې کمېټې ټینګار کړی، چې د نړیوالې جنايي محکمې (ICC) او عدالت نړیوالې محکمې (ICJ) د نړیوال قانون پروسې عملي او همغږي څار ته اړتیا لري، تر څو د قربانیانو لپاره عدالت ته لاسرسی وشي او د جرمونو عاملین بې ځوابه پاتې نه شي.
د بشري حقونو د مدافعینو کمېټې په افغانستان کې د جنسیتي توپیري چلند د یو ځانګړي او عملي قاوني وضعیت په توګه د په رسمیت پېژندلو غوښتنه کړې وايي، د افغانستان مسله باید د بشري حقونو شورا، اروپايي ټولنې او سیاسي ټولنو په فعاله اجنډا کې پاتې شي.
دې کمېټې د بشرحقونو د تضمین ورکولو پرته د طالبانو سره د هر ډول جوړجاړي او اړیکو عادي کولو د بندولو غوښتنه وکړه او ویې ویل، نړیوالې قضايي پروسې لکه د جرمونو نړیواله محکمه او د عدالت نړیواله محکمه باید پیاوړې او په عمل کې یې ملاتړ وشي.
همدارنګه یادې کمېټې د «جرمونو د مستندولو، لاسوندونو راټولولو، د قربانیانو د خوندیتوب او همدارنګه د بشري حقونو د مدافعینو، خبریالانو، ښځینه فعالانو او له ګواښ سره مخ کسانو» د ملاتړ غوښتنه کړې ده.
د بشري حقونو کمېټې په افغانستان کې د بشري حقونو د وضعیت په اړه چوپتیا له ظلم سره ملتیا بللې او له نړیوالې ټولنې، د بشري حقونو له بنسټونو او د خپلواکۍ له مدافعانو یې غوښتي، چې د افغانستان د خلکو ملاتړ وکړي او د هغوی غږ جوړ شي.
