د اسپانیا د بهرنیو چارو وزارت اعلان کړی، چې د افغان ښځو په اړه په خپلو ژمنو ولاړ دی او د طالبانو ډله په رسمیت نه پېژني.
رخشانه: د اسپانیا د بهرنیو چارو وزیر مانوئل آلبارس نن (جمعه د لیندۍ ۲۱ مه) د افغان ښځینه فعالانو په غونډه کې، چې د دې هېواد په مادرید کې د بهرنیو چارو په وزارت کې جوړه شوې وه و ویل: «اسپانیا د افغان ښځو په اړه په خپلو ژمنو ولاړ ده او تر څو چې دا دولت په واک کې وي، طالبان به په رسمیت ونه پېژني.»
ښاغلي آلبارس ویلي، باید د هغو ټولو جنایتونو پلټه وشي، چې طالبانو تر سره کړي او باید پوه شو، چې پېښې رامنځ ته شوې او اسپانیا له طالبانو د ځواب ویلو غوښتونکې ده.
هغه ټینګار کړیو چې د افغان ښځو له ګډون پرته نه شو کولی یوې رښتینې سولې ته ورسېږو، نه په افغانستان کې او نه په بل هر ځای کې.
ښاغلي آلبارس و ویل: «د خبرو اترو پروسه باید د جنسیت پر برابرۍ ولاړه وي او ښځې د راتلونکې په اړه د پرېکړو یوه برخه وي. اسپانیا د افغان ښځو په اړه په خپلو ژمنو ولاړه ده او تر څو دغه دولت په واک کې وي، موږ طالبان په رسمیت نه پېژنو. په تېرو څلورو کلونو کې د بشري حقونو بحران لا ژور شوی او ښځې یې تر ډېره کړاو کاږي، نن ورځ د افغانستان ۱۸ میلیونه ښځې له عمومي ژوند څخه ایستل شوې دي.»
د خوزه مانوئل آلبار په مشرۍ د بهرنیو چارو وزارت اعلان کړی، چې د دغه وزارت یو تلار به د «افغان ښځو او نجونو» په نوم ونوموي، او دا کار د هغوی د مقاومت او مبارزې په پار کوي.
د بهرنیو چارو وزارت ټینګار وکړ، دا تالار همغه ځای دی، چېر چې په ۲۰۲۲ کال کې ګڼ شمېر افغان ښځو بنسټ د Hear Us سره په همکارۍ په لومړۍ غونډه کې ګڼ شمېر مېرمنو ډلیز انځور اخیستی وو.
د افغانستان لپاره د ښځو بنسټ مسوولې فوزیې کوفي، د اسپانیا د بهرنیو چارو وزارت د دې ګام هرکلی کړی وايي، د اسپانیا په بهرنیو چارو وزارت کې د افغان ښځو او نجونو په نوم د یوه تالار نومول، له کلماتو په عمل کې پر خپلو ژمنو د درېدا په مانا ده.
مېرمن کوفي په خپله اېکس پاڼه لیکلي، سره له دې، چې زموږ د خلکو لپاره ټولیزې فضا محدوده شوې او په نړیوالو کړکېچونو کې د افغانستان موضوع څنډې ته کړای شوې ده، په بېلا بېلو برخو کې د اسپانیا د دولت او خلکو پاملرنه د افغان وګړو لپاره ارزښتناکه ده.
هغې ویلي دي، د اسپانیا دولت د هغو شپږو هېوادونو له ډلې وو، چې د افغانستان دوسیه یې د جرمنو ضد نړیوالې محکمې ته وروپېژندله.
د «زموږ غږ واورۍ» تر نوم لاندې د افغان ښځو درېیمه ځانګړې ناسته نن، د اسپانیا په مادرید ښار کې جوړه شوه.
د افغانستان د بشري حقونو لپاره د ملګرو ملتونو ځانګړي راپور ورکوونکي ریچارد بنټ هم ویلي، طالبانو له ۲۰۲۱ کال راهیسې تر اوسه پورې د افغان ښځو پر ژوند بې شمېره محدودیتونه لګولي دي، او د ښځو په وړاندې د دې ډلې تاوتریخوالی د بشریت پر وړاندې جنایت دی.
ښاغلي بنټ وايي، ښځې په ځانګړې توګه قضايي سیستم او عدالت ته له لاسرسي محرومې شوې دي.
بنټ ویلي، د ښځو په وړاندې د طالبانو هر ټول قصدي، سیستماتیک او عقیدوي تاوتریخوالی، نه یوازې یو غیر اخلاقي اقدام دی، بلکې یوه ګواښوونکې ستراتېژي هم ده.
