د بغلان ولایت په شمالي سالنګ کې د یوه مسافر وړونکي بس موټر د چپه کېدو له امله شپږو تنو ژوند له لاسه ورکړی او د ښځو او ماشومانو په ګډون ۴۲ تنه نور ټپیان شوي دي.
رخشانه: دغه پېښه تېره شپه ناوخته (د لیندۍ ۲۹ مه) د بغلان د شمالي سالنګ په پنځمه ګولایۍ کې رامنځ ته شوې ده.
بغلان کې د طالبانو امنیه قوماندانۍ په یوه خرپاڼه کې لیکلي، دا پېښه د یوه ۵۸۰ بس موټر د چپه کېدو له امله رامنځ ته شوې ده.
خبرپاڼه کې راوړل شوي، د دې پېښې په ترڅ کې شپږو تنو ژوند له لاسه ورکړی او د ښځو او ماشومانو په ګډون ۴۲ تنه ټپیان شوي دي.
د دې ترافیکي پېښې د قربانیانو او ټپیانو هویت، عمر او جنسیت نه دی معلوم شوی.
دا مسافر وړونکی بس موټء د بغلان ولایت د مرکز پلخمري ښار څخه د کابل په لور روان وو، چې په سړک د یخک له امله چپه شوی دی.
د دې ترافیکي پېښې ټپیان د درملنې په موخه د بغلان ولایتي روغتون ته لېږدول شوي او د پنځو تنو ټپیانو روغتیايي وضعیت نازک ښودل شوی دی.
د هېواد په یو شمېر ولایتونو کې له تېرو څو ورځو راهیسې واورې او باران پیل کړی دی. هر کال د ژمي په موسم کې ورته پېښې د هېواد په یو شمېر لویو لارو رامنځ ته کېږي.
