د سره صلیب نړیواله کمېټه (ICRC) وايي، افغانستان کې له ۲۱ میلیونه زیاته وګړي د لسیزو جګړو او اقلیمي شرایطو د خرابوالی له امله د څښاک اوبو ته لاسرسی نه لري.
رخشانه: دغه بنسټ نن (دوشنبې د مرغومي اوله) په یوه راپور کې لیکلي، افغانستان په نړۍ کې د یوه سخت بشري بحران سره مخ هېواد دی.
سره صلیب لیکلي، په ۲۰۲۵ میلادي کال کې کابو ۲۲.۹ میلیونه کسانو چې د افغانستان نېږدې نیمايي نفوس جوووي بشري مرستو ته اړتیا لري.
د دې بنسټ په وینا، دغه وضعیت په غیرمتناسب ډول د خوارځواک ماشومانو، زړو، معلولیت لرونکو، د کورنیو د سرپرستو ښځو او ورځنیو مزدورانو په ګډون تر ټولو زیان مننونکي اغېزمن کړي دي.
د سره صلیب په راپور کې راغلي، طبیعي آفتونو او ځايي پراخه ګډوالۍ بشري اړتیاوې مخکې له مخکې زیاتې کړې دي.
په راپور کې راوړل شوي، په ۲۰۲۵ میلادي کال کې میلیونه وګړي له پاکستان او ایران څخه ستانه شوي، چې ډېری د هغو له کمولو توکو سره هېواد ته د ننه شوي او دې پر روغتیايي خدماتو، اوبو، خوړو، ساتنې په ځانګړې توګه په سرحدي ولایتونو کې فشار زیات کړی دی.
سره صلیب ویلي، د ژمي په رارسېدو سره میلیونه وګړي، د سختې یخنۍ، بېوزلۍ او وړ سرپناه د نشتوالي له امله، له لا زیاتو ستونزو سره مخ دي. هغه کورنۍ چې په وروستیو آفتونو کې، له هغې ډلې په چې په کونړ کې د زلزلې له امله بې ځایه شوي، له تر ټولو زیان مننونکو ډلو څخه دي.
دغه بنسټ زیاته کړې، چې د خپل اقتصادي امنیت د پروګرامونو له لارې یې د ټولنو له اړمنو کسانو سره مرسته کړې، تر څو په سختو شرایطو کې خپل اقتصاد، کورنۍ ژوند پیاوړی او د خوړو خوندیتوب ښه کړي.
سره صلیب دا هم ویلي، دوی «په ټول افغانستان کې د ماینونو او ناچاودو توکو ګواښ رسېدنې ته دوام ورکوي، هغه ګواښ، چې د لسیزو وسله والو جګړو وروسته، ټولنې په ځانګړې توګه ماشومان په دوامداره توګه له خطر سره مخ کوي.»
