د کډوالو نړیوال سازمان (IOM) وايي، د طالبانو تر واک لاندې افغانستان کې روغتیايي خدماتو ته لاسرسی لا هم یوه ستونزه ده.
رخشانه: دغه سازمان نن (چهارشنبې د مرغومي ۱۰ مه) په خپله اېکس پاڼه د یوه پوسټ په خپرولو سره لیکلي، یوازې په ۲۰۲۵ میلادي کال کې ۵۰۸ زره او ۴۳۱ مشورې، بېرته راستنېدونکو، داخلي بې ځایه شویو او زیانمنو کورنیو ته ورکړل شوې دي.
د کډوالو نړیوال سازمان ویلي، دغه ملاتړ کې عمومي روغتیايي خدمات، د رواني روغتیا سلامشورې، او رواني- ټولنیزې مرستې شاملې وې.
د دې بنسټ په وینا، ۶۴ زره او ۹۴۷ ښځې له روغتیايي خدماتو برخمنې شوې او له ۹۱ زره زیات په خوارځواکۍ اخته ماشومان تر څېړنې لاندې نیول شوي دي.
د کډوالو نړیوال سازمان زیاته کړې، له ۴۸ زره زیاتو کسانو د رواني روغتیا او رواني – ټولنیز ملاتړ سلامشورې تر لاسه کړې دي.
طالبانو پر ښځو او نجونو د نورو محدودیتونو سربېره، هغوی په پوهنتونونو په ځانګړې توګه د طب په برخه کې له زده کړو راګرځولې دي. د دې محدودیت لګولو اغېزې مستقیمآ د هېواد په روغیتايي برخه پرېوتې دي.
دې محدودیتونو روغتیايي خدماتو ته لاسرسی له زیات محدود کړی او دا به د عمومي روغتیا په ځانګړې توګه د میندو او ماشومانو لپاره ناوړه پایلې له ځان سره ولري.
نړیوالو سازمانونو په وار وار د طالبانو تر واک لاندې افغانستان کې د ښځینه روغتیايي کادرونو له کمښته خبرداری ورکړی ویلي یې دي، چې دغې ډلې په پوهنتونو کې د ښځو د تحصیل په وړاندې د محدودیتونو په لګولو سره د هېواد روغتیايي فلج کړی دی.
