هرات کې یوه خیریه بنسټ د ۱۳۰ ځوانو جوړو د واده مراسم په ډلیزه توګه او د جنسیت په جلاوالي سره تر سره کړل.
رخشانه: د واده دغه ډلیز مراسم نن (پنشنبې د مرغومي ۱۱ مه) د«حبیب یار خیره بنسټ» له خوا په هرات ښار کې تر سره شول.
د دې خیریه بنسټ چارواکو د یادو مراسمو تر سراوی له هغو ځوانانو ملاتړ وباله، چې په جلا توګه د واده تر سره کولو مالي توان نه لري او د اقتصادي ستونزو له امله د واده په تر سره کولو او د کورنۍ په جوړولو نه توانېدل.
د «حبیب یار خیریه بنسټ» مسوول عبدالحق صدیقي سیمه ییزو رسنیو ته ویلي، چې په دې مراسمو کې هرې جوړې ته نغدي مرستې، د واده جامې، ۷۲ قلمه د کور توکي او لومړني غذايي مواد هم وېشل شوي دي.
د صدیقي په وینا، هرې یوې جوړې ته د سل زره افغانیو په ارزښت مهریه ورکړل شوې، چې د ټولو جوړو محموعي مهریه ۱۳میلیونه افغانۍ شوې دي.
بل پلو یو شمېر ځوانې جوړې، چې نن یې ودونه په ډلیزه توګه تر سره کړل، وايي، د دې ډول مراسمو جوړول، د ملاماتوونکو لګښتونو د کمېدو سبب شول او د ځوانانو لباره د واده کول خورا آسانه کوي.
هغوی له نورو سوداګرو، بډایو او خیریه بنسټونو غواړي، چې د دې ډول مراسمو تر سره کولو څخه ملاتړ وکړي او د دې کلتور د دودولو لپاره هڅې وکړي.
