طالبانو د روانې اوونۍ په اوږدو کې په تخار، پروان، بلخ، ارزګان او ننګرهار ولایتونو کې د بېلا بېلو تورونو له کبله، د دریو ښځو په ګډون ۱۴ تنه د خلکو په وړاندې په دورو وهلي دي.
رخشانه: دغه کسان د نامشروع اړیکو، له کوره د تېښتې، د الکولي مشروباتو د پېر او پلور، غلا، د دوه نارینه وو تر منځ د جنسي اړیکې، د بل چا کور ته د تللو او له واده بهر د جنسي اړیکې په تورونو په دې پنځو ولایتونو کې په دورو وهلي دي.
یکشنبې د (مرغومي ۷ مه) د تخار ولایت په درقد ولسوالۍ کې د یوې ښځې په ګډون دوه تنه د نامشروع اړیکې او له کوره د تېښتې په تور د خلکو په وړاندې ۳۵ دورې وهل شوي او په یوه کال تنفذي بند محکوم شوي دي.
دوشنبې د (مرغومي ۸ مه) د پروان ولایت په سیدخېل ولسوالۍ کې د یوې ښځې په ګډون دوه تنه د نامشروع اړیکې په تور، د خلکو په وړاندې ۳۰ دورې وهل شوي او په یوه کال تنفذي بند محکوم شوي دي.
سه شنبې د (مرغومي ۹ مه) د پروان ولایت په سرخ پارسا ولسوالۍ کې د یوې ښځې په ګډون دوه تنه د نامشروع اړیکې په تور د خلکو په وړاندې ۲۰ دورې وهل شوي او په دوه میاشتو او یوه کال تنفذي بند هم محکوم شوي دي.
پنشنبې د (مرغومي ۱۱ مه) په بلخ، ارزوګان او ننګرهار ولایتونو کې اته تنه د الکولي مشروباتو د پېر او پلور، غلا، د دوه نارینه وو تر منځ د جنسي اړیکې، د بل چا کور ته د ځای لېږدولو او له واده بهر جنسي اړیکې په تورونو په عام محضر کې په دورو وهل شوي دي.
یو تن د الکولي مشروباتو د پېر او پلور په تور په بلخ ولایت کې ۳۹ دورې و وهل شو او په یوه کال او دوه میاشتو تنفذي بند هم محکوم شوی دی.
شپږ تنه بیا د غلا، د دوه نارینه وو تر منځ د جنسي اړیکې او د بل چا کور ته د ځای د لېږدولو په تور د اروزګان ولایت په چهارچینو ولسوالۍ کې د خلکو په وړاندې ۳۹ دورې وهل شوي دي.
معلومه نه ده، چې یاد کسان په څومره تنفذي بند محکوم شوي دي.
یو تن له واده بهر جنسي اړیکې په تور د ننګرهار ولایت لعل پوره ولسوالۍ کې ۳۹ دورې وهل شوی او په دوه کاله تنفذي بند محکوم شوی دی.
