ننګرهار کې سیمه ییزې سرچینې وايي، د دې ولایت په مرکز جلال آباد ښار کې یوه سړي د خپل ورور مېرمن وژلې ده.
رخشانه: جلال آباد ښار کې دوه سرچینو ویلي، دغه ښځه نن (یکشنبې د مرغومي ۱۴ مه) د جلال آباد ښار د لومړۍ ناحیې د «کمپونو» په سیمه کې وژل شوې ده.
د جلال آباد ښار په لومړۍ ناحیه کې یوې سرچینې د هویت پټ ساتلو سره ویلي، دغه ښځه شاوخوا ۳۶ کاله عمر درلود او د خپل لېوره له خوا د تومانچې په ډزو وژل شوې ده.
سرچینې زیاته کړې، دغه ښځه د کورني تاوتریخوالي له کبله وژل شوې، خو سرچینې په دې اړه، چې دې ښځې اولاد هم درلود که نه، جزیات نه دي ورکړي.
یوې بلې سرچینې هم چې نه یې غوښتل هویت یې فاش شي ویلي، دا سړی په نشه يي توکو روږدی وو او له پځوا سربېره پر دې چې نشه يي وو، بې روزګاره هم وو.
د رخشانې رسنۍ سرچینو زیاته کړې، دغه کس د خپل ورور د مېرمنې تر وژلو وروسته له سیمې تښتېدلی دی.
ننګرهار کې سیمه ییز طالب چارواکو تر اوسه په دې اړه نظر نه دی څرګند کړی.
ننګرهار د هېواد ختیځ کې یو له هغه ولایتونو دی، چې له دې وړاندې هم په کې ورته پېښې رامنځ ته شوې دي.
واک ته د طالبانو د بیا راتګ وروسته، مرموز قتلونه، وژنې او د ښځو او نجونو ځان وژنې او جنايي پېښې په هېواد کې زیاتې شوې، خو په دې اړه کره شمېرې شتون نه لري.
