د ملګرو ملتونو د ښځو څانګې (UN Women) په یوه اعلامیه کې، د لږ لیده ښځو او ماشومانو د ملاتړ غوښتنه کړې ده.
رخشانه: دغه بنسټ نن (یکشنبې د مرغومي ۱۴ مه د برېل نړیوالې ورځې په مناسبت ویلي: «کله چې لږ لیده ښځې او نجونې برېل لیک ته لاسرسی ولري، خپلې کیسې خپله لیکي.»
د ملګرو ملتونو د ښځو څانګې ټينګار کړی، هغه لږ لیده ښځې او نجونې، چې برېل لیک ته لاسرسی لري، «خپله خپلواکي تر لاسه کوي او یوه پراخه نړۍ جوړوي.»
ملګرو ملتونو هم په یوه اعلامیه کې لیکلي، معلولیت لرونکي کسان ان په عادي شرایطو کې هم له نورو لږ، روغتیايي خدماتو، زده کړو او کار ته لاسرسی لري او په ټولنه کې یې ګډون هم کم دی.
د ملګرو ملتونو په وینا، «معلولیت لرونکې کسان تر ډېره د بېوزلۍ سره مخ کېږي، له تاوتریخوالي لوړې بیې، نه پاملرنه او ناوړه ګټه اخیستنه تجربه کوي او په هره ټولنه کې، چې له بحران سره مخ دي، له تر ټولو څنډې ته کړای شویو ډلو څخه ګڼل کېږي.»
د برېل نړیواله ورځ له ۲۰۱۹ کال راهیسې د اړیکو د یوې وسیلې په توګه د برېل د ارزښت او د ړندو او لږ لیده کسانو د بشري حقونو د بشپړ تحقق په اړه د پوهاوي لوړولو په موخه لمانځل کېږي.
د ملګرو ملتونو د ښځو څانګې څه موده وړاندې اعلان کړی وو، چې په افغانستان کې معلولیت لرونکې ښځې او نجونې له جدي ننګونو او «په پام کې نه نیولو» سره مخ دي.
