د ملګرو ملتونو د سرمنشي مرستیال آمنه محمد، د افغان ښځو او نجونو په وړاندې د طالبانو محدودیتونو ته په اشارې وايي، نړۍ باید افغانستان کې د هغوی له حقونو په سرغړونو سترګې پټې نه کړي.
رخشانه: د ملګرو ملتونو د سرمنشي مرستیالې پرون ناوخته (یکشنبې د مرغومي ۱۴ مه) په خپله اېکس پاڼه د یوه پوسټ په خپرولو سره لیکلي، «د ښځو حقونه په هر ځای کې د بشر حقونه دي.»
هغې پر دوام لیکلي، په افغانستان کې میلیونونه ښځې او نجونې د خپلو اساسي حقونو له هغې جملې زده کړو، کار، امنیت او د تګ راتګ خپلواکۍ کې له سختو محدودیتونو سره مخ دي.
د ملګرو ملتونو د سرمنشي مرستیالې، افغانستان کې د طالبانو له لوري د ښځو او نجونو د حقونو سرغړاوي ته په اشارې ټینګار کړی، چې «نړۍ باید پر دې سرغړونو خپلې سترګې پټې نه کړي.»
طالبانو په تېرو څه باندې څلورو کلونو کې، په افغانستان کې د ښځو او نجونو حقونو او اساسي خپلواکیو سخت محدودیتونه لګولي دي.
افغانستان کې د ملګرو ملتونو د بشري مرستو د همغږۍ دفتر (اوچا) څه موده وړاندې په یوه راپور کې ویلي وو، طالبانو د ښځو په وړاندې د ۷۹ فرمانونو په صادرولو سره، افغانستان د ښځو لپاره په تر ټولو بحراني هېواد بدل کړی دی.
اوچا زیاته کړې وه، طالبانو د ۲۰۲۱ له اګست راهیسې تر اوسه ۴۷۰ فرمانونه صادر کړي، چې ۷۹ هغو یې مستقیمآ ښځې او نجونې موخه ګرځولې او هغوی یې د تګ راتګ، په زده کړو کې د ګډون، کار، اقتصاد او عمومي ژوند له خپلواکیو محدودې کړې دي.
