هرات ولایت کې یو شمېر سوداګرو ښځو په یوه تازه نوښت کې د ښځو لپاره څلورم ځانګړی سوداګریز مرکز په هرات ښار کې پرانستی دی.
رخشانه: دغه سوداګریز مرکز له یوې نیمې میاشتې راهیسې، د هرات ښار د ګلانو څلور لارې کې د ملي سنټر پلورنځي په درېیم پوړ کې پرانستل شوی دی.
په دې مرکز کې ښځې د ښکلا کلېنیک، د جامو پلورنځیو، د سینګار او روغتیايي توکو او سیم کارتونو د ثبت او راجستر په برخو کې فعالیت کوي.
د ښځو لپاره دا ځانګړی شوی مرکز د خدیجه کبرا سوداګریزو مرکزونو، ښخو برخې د مرمر بازار او فردوسي وروسته څلورم ښځینه بازار دی.
د هرات ښار د ملي سنټر پلورنځي مسوولینو او سوداګرو ښځو، د ښځو لپاره ځانګړې شوې څانګې ته د نارینه وو ورتګ بند کړی دی.
د هرات یوې سوداګره مېرمن دنیز احمدي رخشانې رسنۍ ته وویل، چې دې د شاوخوا درې میلیونه افغانیو پانګونې سره د «مارال بیوټي» کمپلېکس پرانستی، چې په کې د جامو او سینګار توکو پلورنځي، د ښکلا کلېنیک او یو رستورانټ شامل دي.
دې سوداګرې مېرمنې له دې وړاندې کابو ۱۴ کاله په هرات کې د سینګاروونکې په توګه فعالیت درلود، خو د طالبانو له لوري د سینګارتون په برخه کې د ښځو په کار تر بندیز او د کسب له لاسه ورکولو وروسته د «مارال بیوټي» کمپلېکس جوړ کړی دی.
احمدي دا مهال د لږ تر لږه ۵۸ ښځو لپاره کاري فرصت برابری کړی دی. هغې له رخشانې رسنۍ سره په خبرو کې و ویل: «۱۴ کاله مې په هرات کې د سینګارګرې په توکه کار وکړ، خو کله چې سینګارول منع شول، د خپلو جامو د تولید څانګه مې پرانسته او له زده کړو پاتې او له ایران څخه راستنې شوې ښځې مې د کارکوونکو په توګه وګمارلې.»
په هېواد د طالبانو تر واکمنۍ او له کار او زده کړو څخه د ښځو تر محرومیت وروسته، یو شمېر مېرمنو سوداګرۍ ته مخه کړې او یو شمېر نورې یې د پلور او خیاطۍ په برخو کې د ښځو لپاره په دې ځانګړي شوي مرکز کې په کار بوختې دي.
مېرمن احمدي د مارال بیوټي کمپلېکس د رامنځ ته کولو تجربه «ګټوره او اغېزمنوونکې» بللې او له هغو ښځو او نجونو چې د محدودیتونو له امله په کور ناستې دي، غواړي، چې په هوډ او هڅو سره د ځان لپاره کاري فضا رامنځ ته کړي او ځان بساینې ته ځان ورسوي.
هغه هیله منده ده، چې هرات کې به یې د کار په پراخېدو سره د خپل برنډ نورې څانګې په نورو ولایتونو کې هم پرانیزي. احمدي د دې له کار څخه د ښځو د ستاینې په اړه و ویل: «له دې کمپلېکسه د ښځو هرکلی خورا ښه وو، ښځې کولی شي په دوستانه او ارامه فضا کې پلورنځي ته راشي او او پېرودونه وکړي، له خپلو ملګرو سره وخت تېر کړي او خواړه وخوري.»
په هرات کې د ښځو په وړاندې د طالبانو د سختو محدودیتونو په ترڅ کې د دې ښار یو شمېر پلورنځي، په ځانګړې توګه ملي سنټر، مرمر او فردوسي سوداګریزو مرکزونو، په خپلو پلورنځیو کې د ښځو او نارینه وو لپاره ځانګړې څانګې جوړې کړې دي.
