د اسپانیا د بهرنیو چارو وزیر خوزه مانوئل آلبارس وايي، «نړۍ د افغان ښځو ستره پوروړې ده، هغه پور چې تر اوسه نه دی ورکړل شوی.»
رخشانه: هغه دا څرګندونې نن «پنشنبې د مرغومي ۱۸ مه) د مادرید د سفیرانو په خبري ناسته کې مطرح کړې.
د دې کنفرانس په څنډه کې له هغې خونې، چې د دې هېواد بهرنیو چارو وزارت کې د افغان ښځو د ملاتړ او د هغوی د حقونو او خپلواکۍ د مبارزې د درناوي په پار د «افغان ښځو او نجونو» په نوم نومول شوې، هم مخکتنه وشوه.
له دې خونې د مخکتنې په مراسمو کې، د اسپانیا لومړي وزیر پدرو سانچز، د بهرنیو چارو وزیر او د ښځو د حقونو یو شمېر افغان فعالانو، په ځانګړې توګه د ښځو د حقونو فعالې او د افغانستان د پارلمان پخوانۍ غړې فوزیې کوفي هم شتون درلود.
د اسپانیا د بهرنیو چارو وزیر دې خونې د مخکتنې په جریان کې و ویل چې «د افغان مېرمنو موضوع» ورته ځانګړی ارزښت لري او هېواد به یې د افغان ښځو ملاتړ ته همداسې دوام ورکړي.
د افغانستان لپاره د ښځو سازمان مشرې فوزیې کوفي دغه ګام «که څه هم کوچینی» خو د افغان ښځو له مبارزې د اسپانیا عملي ملاتړ وباله.
د اسپانیا د بهرنیو چارو وزیر حوزه مانوئل آلبارس څه موده وړاندې د افغان ښځینه فعالانو په ناسته کې اعلان کړی وو، چې د افغان ښځو په اړه په خپلو ژمنو ولاړ دی او د طالبانو ډله به په رسمیت ونه پېژني.
په دې ناسته کې د اسپانیا د بهرنیو چارو وزیر ژمنه وکړه، چې د دې هېواد په بهرنیو چارو وزارت کې به د افغان ښځو په ملاتړ او د خپلو حقونو او خپلواکیو لپاره د هغوی د مبارزې په پار به یوه خونه ونوموي.
طالبانو په تېرو څه باندې څلورو کلونو کې په افغانستان کې د ښځو او نجونو د حقونو او خپلواکیو په اړه سخت محدودیتونه لګولي دي.
سره له دې، چې دا محدودیتونه د نړیوالې ټولنې له خوا سخت غندل شوي، خو طالبانو نه یوازې دا چې دا محدودیتونه لرې کړي نه دي، بلکې لا یې زیات او سخت کړي دي.
