کونړ کې سیمه ییز طالب چارواکي وايي، د دې ولایت په اسمار ولسوالۍ کې د ناچاودو توکو د چاودنې له امله یوې ښځې ژوند له لاسه ورکړی، یوه بله ښځه او یو ماشوم ټپیان شوي دي.
رخشانه: د کونړ اسمارو ولسوالۍ کې د طالبانو ولسوال ملا شفق سیمه ییزه رسنیو ته ویلي، دغه پېښه پرون ماسپښین (چهارشنبې د مرغومي ۱۷ مه) د دې ولسوالۍ په «اغذ باغ پیتاو» کلي کې رامنځ ته شوې ده.
د هغه په وینا، د ناچاودو توکو د چاودنې په پایله کې یوې ښځې ژوند له لاسه ورکړی، یوه بله ښځه ژوره ټپي شوې او یو ماشوم سربېرن ټپی شوی دی.
د ناچاودو توکو ډول او د چاودنې رامنځ ته کېدو څرنګوالی معلوم نه دی.
د اسمارو لپاره طالب ولسوال زیاته کړې، د دې پېښې ټپیان د درملنې لپاره د کونړ مرکز اسعدآباد روغتون ته لېږدول شوي، خو د یوه تن روغتیايي حالت ښه نه دی.
نوموړي د دې پېښې د ټپیانو او قرباني د هویت په اړه څه نه دي ویلي.
د روانې اوونۍ د سه شنبې په ورځ د دې ولایت په نورګل ولسوالۍ کې په ورته پېښه کې، د جګړو مهال د پاتې شوو ناچاودو توکو د چاودنې له آمله، یوه ماشوم ژوند له لاسه ورکړی وو او د ښځو او ماشومانو په ګډون شپږ تنه نور ټپیان شوي وو.
ناچاودي توکي، ماینونه او د جګړو مهال پاتې شوي جنګي توکي هر کال د هېواد د سلګونو وګړو په ځانګړې توګه د ماشومانو او ښځو ژوند اخلي.
