د افغانستان له رسنیو د ملاتړ سازمان (AMSO)کندوز کې د طالبانو له بنده، د سیمه ییزې خبریالې ناظره رشیدي د خوشي کېدو غوښتونکی شوی دی.
رخشانه: دې سازمان تېره ورځ ناوخته (شنبې د مرغومي ۲۰ مه) په یوه اعلامیه کې د طالبانو د استخباراتو له لوري، د دې سیمه ییزې خبریالې نیول «په کلکه غندلي» دي.
ناظره رشید، د اورانوس تلوېزیون او کندوز راډیو خبریاله وه.
له دې مخکې دې خبریالې ته یوې نېږدې سرچینې رخشانې رسنۍ ته ویلي وو، چې هغه د تېرې اوونۍ د سه شنبې په ورځ د طالبانو له لوري نیول شوې او وروسته یوه نامعلوم ځای ته لېږدول شوې ده.
د رخشانې رسنۍ سرچینې زیاته کړې وه، ناظره راشیدي د دوه ماشومانو مور او د کورنۍ یوازې ډوډۍ راوړونکې ده.
د افغانستان له رسنیو د ملاتړ سازمان، له طالبانو غوښتي، چې دا خبریاله له قید و شرط او ځنډ پرته ژر تر ژره خوشې کړي.
یاد سازمان له نړیوالو بنسټونو، د بیان د آزادۍ ملاتړو سازمانونو او بشري حقونو له سازمانونو غواړي، چې دا دوسیه جدي وڅاري او د ښځینه خبریالانو نیولو او دوامداره ځورونو د مخنیوي لپاره عملي ګامونه پورته کړي.
د افغانستان له رسنیو د ملاتړ بنسټ ټینګار کړي، چې د خبریالانو نیونې، ګواښ او غلي کول، د بیان له آزادۍ ښکاره سرغړونه ده او باید سملاسي پای ته ورسېږي.
کندوز کې سیمه ییز طالب چارواکو تر اوسه د دې سیمه ییزې خبریالې د نیولو په اړه څه نه دي ویلي.
