پاکستان کې د مېشتو افغان کډوالو تر منځ سرچینې وايي، د دې هېواد پولیسو یوه افغان ښځینه خبریاله نیولې ده.
رخشانه: یوې خبرې سرچینې رخشانې رسنۍ ته ویلي، دغه ښځینه خبریاله، سمین محمدي چې په اسما محمدي مشهوره ده، نن (سه شنبې د مرغومي ۲۳ مه) له ماسپښین مخکې شاوخوا ۱۱:۳۰ بجې د اسلام آباد له «فیصل ټاون» څخه نیول شوې ده.
سرچینې چې نه غوښتل نوم یې په خبر کې یاد شي وايي، د دې ښځینه خبریالې تر نیول کېدو وروسته، د هغې شمېره هم له اړیکې نیولو وتلې ده.
سرچینې زیاته کړې، اسما محمدي له تېرو څه باندې دریو کلونو راهیسې په پاکستان کې ژوند کاوه.
د سرچینې د خبرو په وینا، دې ښځینه خبریالې د وېزې نه نوي کېدو په دلیل په پټه په یوه کور کې ژوند کاوه. دا خبریاله د پروان د سیمه ییزه رسنیو سره د همکارۍ مخینه لري.
تر اوسه معلومه نه ده، چې دا ښځینه خبریاله چېرته لېږدول شوې ده.
د طالبانو واک ته له رسېدو وروسته، د پخواني حکومت ډېری نظامیان، دولتي کارکوونکي، خبریالان او د بشري حقونو فعالان، چې ګاونډیو هېوادونو ته کډوال شوي، تر اوسه د کډوال مننوونکو هېوادونو د وېزې په تر لاسه کولو نه دي بریالي شوي.
د دې کډوالو ډېری چې د کوربه هېوادونو له لوري بېرته افغانستان ته استول شوي، د طالبانو له لوري نیول شوي او زندني شوي او نور کډوال په دوامداره توګه، د طالبانو تر واک لاندې افغانستان ته د ایستلو په ګواښ اندېښنه څرګنده کړې ده.
