ننګرهار کې ځايي طالب چارواکي وايي، د دې ولایت په بټي کوټ ولسوالۍ کې د ګاز ډبې د چاودنې له کبله، د څلورو ماشومانو په ګډون ۱۴ تنه ټپیان شوي دي.
رخشانه: ننګرهار کې د طالبانو د امنیه قوماندانۍ ویاند سید طیب حماد، ویلي، دغه پېښه تېره ورځ ناوخته (چهارشنبې د مرغومي ۲۴ مه) د بټي کوټ ولسوالۍ په «سپین خوړ» سیمه کې رامنځ ته شوې ده.
د هغه په وینا، د یوه هوټل د ننه د ګازو یوه ډبه چاودلې، چې په ترڅ کې یې د څلورو ۱۲ کلنه ماشومانو په ګډون د هوټل ۱۴ تنه شاګردان ټپیان شوي دي.
د دې پېښې ټپیان، د ځايي خلکو په همکارۍ د درملنې لپاره روغتون ته لېږدول شوي او د هغوی روغتیايي وضعیت د ډاډ وړ دی.
د دې ګاز ډبې د چاودنې دلیل« د پایپ لیکي او د ډېرې تودخې له امله د هغې سوځېدنه» بلل شوې ده.
