فاریاب کې سیمه ییز طالب چارواکي وايي، د دې ولایت په قیصار ولسوالۍ کې د راکټ د یوې مرمۍ د چاودنې له امله، دوو ماشومانو ژوند بایللی او یوه ښځه او یو بل ماشوم ټپیان شوي دي.
رخشانه: فاریاب کې د طالبانو د امنیه قوماندانۍ ویاند عبدالله مرادي ځايي رسنیو ته ویلي، دغه پېښه نن (پنشنبې د مرغومي ۲۵ مه) له ماسپښین مخکې کابو ۱۱:۰۰ بجې د قیصار ولسوالۍ په «طوی مست» کلي کې رامنځ ته شوې ده.
مرادي وايي، د راکټ د یوې مرمۍ د چاودنې په پایله کې، دوه ۱۲ او ۱۳ کلن ماشومانو ژوند بایللی او یوه ښځه او یو بل ماشوم سربېرن ټپیان شوي دي.
هغه ویلي، د دې پېښې ټپیان د درملنې لپاره روغتون ته لېږدول شوي دي.
دغه پېښه هغه مهال رامنځ ته شوې، چې ماشومانو د راکټ مرمۍ له موندلو وروسته، په هغې کې لاسوهنه کړې او په پایله کې یې چاودنه رامنځ ته شوې ده.
هر کال په ټول هېواد کې لسګونه تنه په ځانګړې توګه ښځې او ماشومان د جګړو د دوران د پاتې شویو ماینونو او ناچاودو توکو په چاودنو کې قرباني کېږي.
