طالبانو د روانې اوونۍ په اوږدو کې، په بلخ، کابل، غزني، کونړ، پکتیا، هرات او کندوز ولایتونو کې د دوه ښځو په ګډون ۳۶ تنه د بېلا بېلو تورونو له کبله د خلکو په وړاندې په دورو وهلي دي.
رخشانه: دغه کسان، د الکولي مشروباتو د قاچاق، له واده بهر جنسي اړیکې، د دوه نارینه وو تر منځ جنسي اړیکې، اخلاقي فساد، نامشروع اړیکې، غلا او الکولي مشروباتو د څښلو او قاچاق په دې اتو ولایتونو کې په دورو وهل شوي دي.
د شنبې په ورځ (مرغومي ۲۰مه) بلخ کې دوه تنه د الکولي مشروباتو د قاچاق په تور په عام محضر کې ۳۹ دورې و وهل شول.
معلومه نه ده، چې دې کسانو ته څومره موده بند سزا اورول شوې ده.
د یکشنبې ورځ «مرغومي ۲۱ مه» د کابل چهارآسیاب ولسوالۍ کې یو تن له واده بهر جنسي اړیکې په تور د خلکو په وړاندې ۳۹ دورې و وهل شو او په درې کاله تنفذي بند محکوم شو.
دوشبنې «مرغومي ۲۲ مه» کونړ او پکتیا کې ۹ تنه د دوه نارینه وو تر منځ د جنسي اړیکې او اخلاقي فساد په تور د خلکو په وړاندې په دورو و وهل شول.
درې تنه د دوه نارینه وو تر منځ د جنسي اړیکې په تور په کونړ ولایت کې د خلکو په وړاندې ۳۹ دورې و وهل شول او په درې کاله تنفذي بند محکوم شوي دي.
شپږ تنه د اخلاقي فساد په تور د پکتیا ولایت څمکنۍ ولسوالۍ کې د خلکو په وړاندې له ۲۰ تر ۳۰ دورو وهل شوي دي.
معلومه نه ده، چې دې کسانو ته څومره موده بند سزا اورول شوې ده.
سه شنبې «مرغومي ۲۳ مه» دوه تنه د نامشروع اړیکې په تور د غزني ولایت جاغوري ولسوالۍ کې ۱۰ او ۳۵ دورې وهل شوي او له شپږو تر اتو میاشتو پورې د تنفذي بند حکم پرې شوی دی.
چهارشنې «مرغومي ۲۴ مه» د یوې ښځې په ګډون اته تنه د اخلاقي فساد، غلا او دوه نارینه وو تر منځ د جنسي اړیکې په تور په پکتیکا او غزني کې د خلکو په وړاندې په دورو وهل شوي دي.
پنځه تنه د اخلاقي فساد، غلا او دوه نارینه وو تر منځ د جنسي اړیکې په تور د پکتیکا ولایت خوشامند او وازه خوا ولسوالیو کې د خلکو په وړاندې د ۱۵ تر ۳۵ دورو وهل شوي او له یوه کاله تر دوه کلونو او شپږو میاشتو په تنفذي بند هم محکوم شوي دي.
د یوې ښځې په ګډون درې تنه د اخلاقي فساد او غلا په تور د غزني ولایت ده یک ولسوالۍ کې د خلکو په وړاندې له ۲۰ تر ۳۵ دورو وهل شوي او په یوه کال تنفذي بند محکوم شوي دي.
پنشنبې «مرغومي ۲۵ مه» د یوې ښځې په ګډون ۱۴ تنه، د نامشروع اړیکې، د دوه نارینه وو تر منځ د جنسي اړیکې، غلا، الکولي مشروباتو د څښلو او قاچاق په تور په هرات، کونړ او کندوز ولایتونو کې د خلکو په وړاندې په دورو و وهل شول.
د یوې ښځې په ګډون اووه تنه د نامشروغ اړیکې، د دوه نارینه وو تر منځ د جنسي اړیکې او غلا په تور د هرات ولایت، ادرسکن، پښتون زرغون او شنیډنډ ولسوالیو کې د خلکو په وړاندې له ۳۰ تر ۳۹ دورو وهل شوي دي.
دغه کسان په دې درې ولسوالیو کې د طالبانو د ابتدایه محکومو د پرېکړو پر اساس په یوه کال تنفذي بند هم محکوم شوي دي.
یو تن د دوه نارینه وو تر منځ د جنسي اړیکې په تور د کونړ ولایت غازي آباد ولسوالۍ کې د خلکو په وړاندې ۳۰ دورې وهل شوی او په یوه کال تنفذي بند محکوم شوی دی.
څلور تنه د الکولي مشروباتو د څښلو او قاچاق او دوه نارینه وو تر منځ د جنسي اړیکې په تور په کندوز ښار کې د خلکو په وړاندې له ۲۰ تر ۳۹ دورو وهل شوي او همدارنګه په دوه میاشتو او دوه کلونو تنفذي بند محکوم شوي دي.
