په افغانستان کې د ملګرو ملتونو د سیاسي استازولی دفتر (یوناما) ویلي، د افغانستان د غالۍ اوبدلو او څرخ کارانو شاوخوا ۹۰ سلنه ښځې دي.
رخشانه: دغه بنسټ تېره ورځ (جمعه د مرغومي ۲۶ مه) په خپله فسبوک پاڼه د یوه پوسټ په خپرولو سره لیکلي، ډېری هغه مېرمنې، چې « د [غالیو] د تولید په کړۍ کې کار کوي، کم مزدوري تر لاسه کوي.»
یوناما ویلي، تېره اوونۍ په افغانستان کې د ملګرو ملتونو د ښځو چارو دفتر د «ازبیکستان په آزاد آیریتوم» سیمه کې ځانګړی ورکشاپ په لار اچولی وو، تر څو د غالیو د تولید په ټولو پړاونو کې د افغان ښځو لپاره د څرخ کارۍ او اوبدلو فرصتونه زیات کړي.
دغه بنسټ زیاته کړې، د افغانستان په شمال کې بلخ ولایت د ملي غالیو د تولید ۷۰ سلنه جوړوي.
په افغانستان کې د ملګرو ملتونو د ښځو څانګې ځانګړې استازې سوزان فرګوسن ویلي دي: «له ښځو د غالیو د تولید په هر پړاو کې باید ملاتړ وشي، د وړیو او سنۍ کولو له تولید نیولې، تر اوبدلو، بشپړولو او د سوداګریزې پراختیا پورې.»
هغې زیاته کړې، «د افغانستان د غالیو صنعت د افغان ښځو د هڅو او مهارتونو له کبله دومداره پاتې شوی دی.»
فرګوسن ژمنه وکړه چې «د ښځو مشرتابه» به پیاوړی کوي، تر څو ډاډه شي، چې هغوی له هغو لویو کلتوري او اقتصادي ارښتونو چې رامنځ ته کوي یې، ګټمنې شي.
