د «افغان ښځو د همت» اعتراضي غورځنګ ویلي، کندوز کې د ځايي خبریالې ناظره رشیدي او هرات کې د یوې لوبغاړې خدیجه احمدزاده خپل سره او غیرقانوني نیونه، د ښځو عزت ته سپکاوی دی.
رخشانه: د دې اعتراضي غورځنګ غړو نن (یکشنبې د مرغومي ۲۸ مه) په یوه اعلامیه کې له ښځو سره د طالبانو چلند د اساسي مدني حقونو ښکاره سرغړونه، د شریعت د اصولو خلاف او د انساني کرامت سره په ټکر کې وباله.
د دې اعتراضي غورځنګ په اعلامیه کې راغلي: «له زده کړو او کار څخه د ښځو محرومول، نه د اسلام صریح حکم دی او نه هم عدالت. دغه چلند د اساسي مدني حقونو څخه ښکاره سرغړاوی، د شریعت د اصولو خلاف او له عقل، عدالت، او انساني کرامت سره په ټکر کې دي.»
معترضو ښځو ویلي چې «د ښځو سپکاوی د نیمايي ټولنې سپکاوی دی او هغه ټولنه چې خپل نیمايي غلې کوي، هېڅکله به عزت، ثبات او پرمختګ ته ونه رسېږي.»
هغوی د طالبانو له بنده د دې ښځینه خبریالې او ښځینه تکواندو روزونکې د خوشي کېدو غوښتنه کړې وايي، د طالبانو له لوري د دوی نیول، «د هغوی عزت او شرافت ته سپکاوی دی، نه له هغوی ساتنه.»
د افغانستان د بشري حقونو د چارو لپاره د ملګرو ملتونو ځانګړي راپور ورکوونکي ریچارد بنټ تېره ورځ، د طالبانو له بنده د ناظره رشیدي او خدیجه احمدزاده د ژر تر ژره خوشي کېدو غوښتنه کړې وه.
کندوز کې سیمه ییزه ښځینه خبریاله ناظره رشیدي دوه اوونۍ وړاندې د سه شنبې په ورځ د (مرغومي ۱۶ مه) له کوره له وتلو وروسته نیول شوې وه.
د افغانستان د تکواندو د ملي لوبډلې غړې او د دې څانګې روزونکې خدیجه احمدزاده د تېرې اوونۍ د شنبې ورځ د (مرغومي ۲۰ مه) د هرات په جبرییل ښارګوټي کې د یوه پټ کلپ څخه د طالبانو د امربالمعروف ځواکونو له خوا نیول شوې ده.
پر دې ښځینه روزونکې سربېره د هغې پلار او هغه سړی، چې خپل کور یې دې پټ ښځینه کلپ ته ځانګړی کړی وو، هم له هغې سره نیول شوي او له څو ورځو وروسته، د طالبانو له بنده خوشي شوي دي، خو احمدزاده لا هم د طالبانو په بند کې ده.
د دې ښځینه خبریالې او د ښځو روزونکې نیولو په خواله رسنیو ګڼ غبرګونونه راپارولي دي. معترضې مېرمنې، د بشري حقونو فعالان او د لوبو مشهورې او پېژندل شوې څېرو، د طالبانو له بنده د دې دو تنو د ژر تر ژره خوشي کېدو غوښتونه کړې ده.
