د ایمرجنسۍ روغتون چارواکي وايي، د کابل په شهر نو کې د نن په چاودنه کې د اوو وژل شویو او ۱۳ ټپیانو په ګډون ۲۰ تنه دغه روغتون ته وروړل شوي دي.
رخشانه: دغه روغتون نن ماښام (دوشنبې د مرغومي ۲۹ مه) په یوه اعلامیه کې ویلي، د دې پېښې وژل شوي او ټپیان د دغه روغتون «بېړنۍ څانګې» ته لېږدول شوي دي.
ایمرجنسي روغتون په خپله اعلامیه کې لیکلي، د دې پېښې د وژل شویو او ټپیانو شمېر لنډمهالی دی.
په افغانستان کې د دې روغتون مدیر دژان پنیک ویلي، ځینې ټپیان د عملیاتو لپاره تر ارزونې لاندې دي.
کابل کې د طالبانو امنیه قوماندانۍ هم د دې چاودنې پخلی کړی وايي، دغه چاودنه د شهر نو د «ګل فروشۍ» په کوڅه کې د «چیني نودل» مشترک هوټل کې رامنځ ته شوې ده.
د دې قوماندانۍ ویاند خالد ځدراڼ وايي، دغه هوټل په مشترکه توګه د یوه چنیايي مسلمان عبدالمجید، د هغې د مېرمنې او د عبدالجبار محمود په نوم د یوه افغان وګړي له خوا پر مخ وړل کېده.
هغه زیاته کړې، چې په دې چاودنه کې د ایوب په نوم یو مسلمان چیني وګړي او شپږو تنو افغانانو ژوند بایللی او څو تنه نور ټپیان شوي دي.
ځدراڼ ټینګار کړی، چې چاودنه د هوټل پخلنځي ته نېږدې رامنځ ته شوې، خو نوعیت یې تر اوسه معلوم دی او څېړنې روانې دي.
تر اوسه پورې هېچا یا هېڅ ډلې د دې برید مسوولیت پر غاړه نه دی اخیستی.
