د بلخ ولایت مرکز مزارشریف ښار کې سیمه ییزه سرچینې وايي، یوه ماشومه نجلۍ د دې ښار د اوومې ناحیې څخه تښتول شوې ده.
رخشانه: مزارشریف ښار کې درې سرچینو د دې پېښې د پخلي تر څنګ رخشانې رسنۍ ته ویلي، دغه ماشومه د یکشنبې په ورځ د (مرغومي ۲۸ مه) د «شپږم انصاري» سیمې څخه تښتول شوې ده.
د سرچینو په وینا، دغه ماشومه نجلۍ آرشیدا نومېږي او دوه نیم کلنه ده.
په هغه ویډیوګانو کې، چې د دې ماشومې د تښتونې څخه په خواله رسنیو خپرې شوې، لیدل کېږي، چې هغه د یوې چادرۍ لرونکې ښځې له خوا تښتول کېږي.
له دې پېښې د دوو ورځو په تېرېدو سره، تر اوسه د دې ماشومې له برخلیک څخه کوم خبر په لاس کې نشته.
بلخ ولایت کې ځايي طالب چارواکو تر اوسه د دې پېښې په اړه څه نه دي ویلي.
