د افغانستان د بشري حقونو د چارو لپاره د ملګرو ملتونو ځانګړي راپور ورکوونکي ریچارد بنټ د «بشريت په وړاندې د جنایت د مخنیوي او سزا» د خبرو اترو له پیل سره سم، له هېوادونو غوښتي، چې په افغانستان کې جنسیتي توپیر د بشریت په وړاندې د جرم ګڼلو څخه ملاتړ وکړي.
رخشانه: ښاغلي بنټ نن (چهارشنبې د سلواغې اوله) په خپله اېکس پاڼه د یوه پوسټ په خپرولو سره ویلي، چې دی په نیویارک کې د ښځو او نجونو په وړاندې د تبعیض په اړه د کاري ډلې (WGDAWG) سره یو ځای کېږي.
هغه پر دوام لیکلي: «زه د افغان ښځو د مانا لرونکي ګډون غوښتونکی یم او دولتونه هڅوم چې جنسیتي توپیر د بشریت په وړاندې د جرم ګڼلو په توګه ملاتړ وکړي.»
د ملګرو ملتونو کارپوهانو هم دوه ورځې وړاندې له غړو هېوادونو غوښتي وو، چې باید د نوي تړون «د بشریت په وړاندې د جنایت مخنیوي او سزا ورکولو» په راتلونکو خبرو اترو کې، په افغانستان کې «جنسیتي توپير» د بشریت په وړاندې د جرم په توګه په رسمیت وپېژندل شي.
هغوی په اعلامیه کې ټینګار کړی وو، چې د دې تړون مشروعیت او اغېزمتوب یوازې په هغه صورت کې ممکن دی، چې د ښځو، نجونو او ټولو هغه کسانو، چې د جنسیت په دلیل موخه ګرځېدلې دي، مانا لرونکی ګډون په هغې کې و اوډل شي.
طالبانو په تېرو څلورو کلونو کې د محرومیتونو په پلي کولو له هغې جملې، له شپږم ټولګي پورته له ښوونځي د نجونو راګرځول، د ښځو د کار پر حق سخت محدودیت او په عمومي ټولنیز ژوند کې د هغوی ګډون جرم ګڼلو سره د ښځو او نجونو د لرې کولو لپاره منظمه او بنسټیز پالي تعقیب کړې ده.
