په ملګرو ملتونو کې د افغانستان د دایمي استازولۍ سرپرست نصیراحمد فایق د دې سازمان په پیلزه کمېټه کې د «بشریت ضد جرمونو د مخینوي او سزا په اړه د کنوانسیون» د مسودې پر اړتیا ټینګار کړی او جنسیت توپیر یې د بشریت په وړاندې د جرم په توګه د پېژندلو غوښتنه کړې ده.
رخشانه: ښاغلي فایق تېره ورځ ناوخته (سه شنبې د مرغومي ۳۰ مه) په خپله اېکس پاڼه د یوه پوسټ په خپرولو سره لیکلي، «افغانستان کې ښځې او نجونې د منظمو او سیستماتیکو تاوتریخوالیو قرباني دي.»
په ملګرو ملتونو کې د افغانستان د دایمي استازولۍ سرپرست په خپله وینا، کې د بشریت ضد جرمونو د مخینوي او سزا په اړه د کنوانسیون د مسودې ملاتړ وکړ او د ځانګړي تړون نشتوالی یې د «اغېزمن مخینوي او حساب ورکولو په وړاندې خنډ» ګڼلی دی.
هغه پر دوام خبرداری ورکړی، چې د طالبانو تر واک لاندې افغانستان کې د بشریت پر وړاندې جنایات، له هغې جملې خپل سرې نیونې، لاردکه کول، ربړونه، ځورولو او په زور کډوالي دوام لري.
فایق له زده کړو، کار، ټولنیز ژوند او عدالت ته له نه لاسرسي د ښځو او نجونو سیتماتیک محرومیت ته په اشارې ویلي، چې هغوی د طالبانو تر واک لاندې افغانستان کې د تاوتریخوالي اصلي هدف دي.
په ملګرو ملتونو کې د افغانستان د دایمي استازولۍ سرپرست ټینګار کړی، چې د ښځو په وړاندې د طالبانو محدودیتونه د «بشریت په وړاندې جنایت بېلګې» دي.
هغه «جنسیتي توپیر ته د بشريت په وړاندې د جرم په توګه د جدي پاملرنې غوښتنه کړې ده» او د «قربانیانو، په ځانګړې توګه د ښځو، ماشومانو او بې ځایه شویو خلکو لپاره د ملاتړ، ګډون او تاوان» په ورکولو یې ټينګار کړی دی.
فایق د خپلې وینا په پای کې و ویل، راتلونکی کنوانسیون باید داخلي مسوولیت پیاوړی کړي او نړیواله اغېزمنه همکاري هم باید تضمین کړي.
د ملګرو ملتونو کارپوهانو هم دوه ورځې وړاندې له غړو هېوادونو غوښتي وو، چې باید د نوي تړون «د بشریت په وړاندې د جنایت مخنیوي او سزا ورکولو»
په راتلونکو خبرو اترو کې، په افغانستان کې «جنسیتي توپير» د بشریت په وړاندې د جرم په توګه په رسمیت وپېژندل شي.
هغوی په اعلامیه کې لیکلي وو، چې طالبانو په ۲۰۲۱ کې د واک تر لاسه کولو راهیسې د محرومیتونو په پلي کولو له هغې جملې، له شپږم ټولګي پورته له ښوونځي د نجونو راګرځول، د ښځو د کار پر حق سخت محدودیت او په عمومي ټولنیز ژوند کې د هغوی ګډون جرم ګڼلو سره د ښځو او نجونو د لرې کولو لپاره منظمه او بنسټیزه پالي تعقیب کړې ده.
