ننګرهار کې د طالبانو امنیه قومانداني وايي، د دې ولایت په سپین غر ولسوالۍ کې د ګازو د یوې ډبې د چاودنې له امله دوو ښځو ژوند بایللی او دوه ماشومان ټپیان شوي دي.
.رخشانه: دغه قوماندانۍ په یوه خبرپاڼه کې لیکلي، یاد پېښه تېره شپه (د مرغومي ۳۰ مه) په «شډل رغزي» کلي کې رامنځ ته شوې ده
خبرپاڼه کې راوړل شوي دي، چې د ګاز ډبې چاودنه د استوګنې د یوه کور د ننه رامنځ ته شوې، چې په ترڅ کې یې دوو ښځو ژوند له لاسه ورکړی او دوه نور ماشومان ټپیان شول.
د دې پېښې ټپیان د درملنې په موخه روغتون ته لېږدول شوي. د دې پېښې د قربانیانو د هویت، عمر او ټپیانو د روغتیايي حالت په اړه څه نه دي ویل شوي.
د ګاز ډبې د دې چاودنې د رامنځ ته کېدو علت نه دی معلوم شوی، خو له دې وړاندې ورته پېښې د بې پروایۍ او له ګازو د ناوړه ګټې اخیستنې له امله رامنځ ته شوې دي.
د تېرې اوونۍ د چهارشنبې په ورځ هم د دې ولایت په بټي کوټ ولسوالۍ کې د ګاز ډبې د چاودنې له امله د څلورو ښځو په ګډون ۱۴ تنه ټپیان شوي وو.
د ګازو دا ډبه د یوه هوټل د ننه چاودلې وه، چې په ترڅ کې يې د څلورو کابو ۱۲ کلنو ماشومانو په ګډون د هوټل ۱۴ تنه کارکوونکي ټپیان شوي وو
