طالبانو روانه اوونۍ په کابل، بلخ، فاریاب، بغلان، ننګرهار او هرات ولایتونو کې د څلورو ښځو په ګډون ۳۴ تنه د بېلا بېلو تورونو له امله د خلکو په وړاندې په دورو وهلي دي.
رخشانه: دغه کسان، د جنسي اړیکې، نامشروع اړیکې، له کوره د تېښتې، اخلاقي فساد، د نشه يي توکو او الکولي مشروباتو د پېر، پلور، قاچاق او کارونې، غلا او دوه نارینه وو تر منځ د جنسي اړیکې په تورونو په دې شپږو ولایتونو کې په دورو وهلي دي.
شنبې د (د مرغومی ۲۷ مه) یو تن له واده بهر جنسي اړیکې په تور، کابل کې د طالبانو د ښاري ابتدایه محکمې د دریم زون له خوا ۳۹ دورې وهل شوی او په یوه کال او شپږ میاشتې تنفذي بند هم محکوم شوی دی.
یکشنبې د (مرغومي ۲۸ مه) یو تن له واده بهر جنسي اړیکې په تور، کابل کې د طالبانو د ښاري ابتدایه محکمې د څلورم زون له خوا ۳۵ دورې وهل شوی او په دوه کاله تنفذي بند محکوم شوی دی.
دوشنبې د (مرغومي ۲۹ مه) د یوې ښځې په ګډون څلور تنه، د نامشروع اړیکې، له کوره د تېښتې او اخلاقي فساد په تورونو په فاریاب او بغلان ولایتونو کې په دورو وهل شوي دي.
د یوې ښځې په ګډون درې تنه د نامشروغ اړیکې او له کوره د تېښتې په تور د فاریاب ولایت په خواجه موسی او قرمقول ولسوالیو کې د خلکو په وړاندې له ۳۰ تر ۳۹ دورو وهل شوي دي. له دې کسانو دوه تنه په درې کال تنفذي بند هم محکوم شوي دي.
یو تن له کوره د تېښتې او اخلاقي فساد په تور په بغلان ولایت کې ۲۵ دورې وهل شوی او په شپږ میاشتې تنفذي بند هم محکوم شوی دی.
سه شنبې د (مرغومي ۳۰مه) د دوه ښځو په ګډون ۱۹ تنه د نامشروع اړیکې، له کوره د تېښې، نشه يي توکو او الکولي مشروباتو د پېر، پلور، قاچاق او کارونې په تور په بلخ او ننګرهار ولایتونو کې په دورو وهل شوي دي.
درې تنه د الکولي مشروباتو د قاچاق په تور د بلخ ولایت په مرکز مزارشریف ښار کې ۳۹ دورې وهل شوي. معلومه نه ده، چې دې کسانو ته څومره موده بند سزا اورول شوې ده.
د دوه ښځو په ګډون ۱۶ تنه د نامشروع اړیکې، له کوره د تېښتې، نشه يي توکو او الکولي مشروباتو د پېر، پلور، قاچاق او کارونې په تور په ننګرهار کې د خلکو په وړاندې له ۱۰ تر ۳۹ دورو وهل شوي دي.
معلومه نه ده، چې دا کسان په څومره موده بند محکوم شوي دي.
چهارشنبې د (سلواغې اوله) د یوې ښځې په ګډون نهه تنه د غلا، له واده بهر جنسي اړیکې او د دوه نارینه وو تر منځ د جنسي اړیکې په تور، په کابل او هرات ولایتوو کې په دورو وهل شوي دي.
شپږ تنه د غلا په تور کابل کې د طالبانو د ابتدایه محکمې د څلورم زون له خوا د ۲۰ تر ۳۹ دورې وهل شوي او په دوه او درې کاله تنفذي بند محکوم شوي دي.
د یوې ښځې په ګډون درې تنه د دوه نارینه وو تر منځ د جنسي اړیکې او له واده بهر جنسي اړیکې په تور د هرات ولایت په کرخ ولسوالۍ کې د خلکو په وړاندې له ۲۱ تر ۳۱ دورې وهل شوي او په یوه کال او شپږ میاشتې او دوه کلونو تنفذي بند محکوم شوي دي.
