په افغانستان کې د اروپايي ټولنې دفتر، د برېتانیا ځانګړي استازي او د افغانستان د بشري حقونو د چارو لپاره د ملګرو ملتونو ځانګړي استازي د زده کړې نړیوالې ورځې په مناسبت، زده کړو ته د ښځو او نجونو په لاسرسي ټینګار کړی دی.
رخشانه: د اروپايي ټولنې دفتر نن (شنبې د سلواغې ۴ مه) د زده کړې نړیوالې ورځې په مناسبت په دې بنسټ پورې تړلې اېکس پاڼه لیکلي، کیفیت لرونکې زده کړې او ورته لاسرسی یو اساسي حق دی.
دې سازمان په افغانستان کې د پوهنې ملاتړ ته ژمنتیا وښوده او ویلي یې دي، چې له بېلا بېلو سازمانونو سره په ګډه کار کوي، تر څو ډاډ تر لاسه شي، چې هېڅ ماشوم له زده کړې پاتې نه شي.
اروپايي ټولنې ویلي، به افغانستان کې یې د ښونځیو د ماشومانو د تغذیې د ښه کولو لپاره شاوخوا ۲۰ میلیونه یورو مرسته کړې ده.
د افغانستان لپاره د ملګرو ملتونو ځانګړي استازي ریچارد لندسي هم ویلي، چې دی د نجونو د زده کړو له حق څخه ملاتړ کوي.
ښاغلي لندسي په خپله اېکس پاڼه لیکلي، برېتانیا له طالبانو غواړي، چې ښځو او نجونو ته اجازه ورکړي، تر څو وکولی شي زده کړو ته لاسرسی ولري، ځکه لوستې نجونې د افغانستان په ګټه دي.
د افغانستان د بشري حقونو د چارو لپاره د ملګرو ملتونو ځانګړي استازي ریچارد بنټ ویلي، د ښځو او نجونو د زده کړو په وړاندې د طالبانو محدودیتونه، د افغانستان په راتلونکې منفي اغېز کوي.
ښاغلي بنټ په خپله اېکس پاڼه، ټول ماشومان او ځوانان باید تل وتوانېږي، کیفیت لرونکو او لوړو زده کړو ته لاسرسی ولري.
نوموړي زیاته کړې، طالبانو د محدودیتونو په لګولو سره، په افغانستان کې میلیونونه ښځې او نجونې له زده کړو بې برخې کړې دي.
هغه په افغانستان کې د ښځو او نجونو د زده کړو په اړه د طالبانو محدودیتونو ته په اشارې لیکلي «دا محدودیتونه نه یوازې د هغوی په ژوند، بلکې د هېواد په راتلونکې اغېز کوي.»
یونسکو او یونسف سازمانونو هم نن د زده کړې نړیوالې ورځې په مناسبت په ګډه اعلامیه کې لیکلي، چې په افغانستان کې ۲.۲ میلیونه ځوانې نجونې، د طالبانو د محدودیتونو له امله له زده کړو بې برخې شوې دي.
دې دوادو بنسټونو په افغانستان کې د زده کړو حق د خوندیتوب لپاره د بېړنیو ګامونو پورته کېدو غوښتنه کړې او لیکلي یې دي، افغانستان په نړۍ کې یوازینی هېواد دي، چې د نجونو او ښځو لپاره په کې منځنۍ او لوړې زده کړې په بشپړه توګه بندې شوې دي.
نجونې او ښځې د طالبانو د بیاځلي واکمنۍ وروسته، کابو څلور کاله وړاندې د زده کړو له حق څخه محرومې کړای شوې.
