د طالبانو له لوري له کوره بهر د ښځو په کارکولو د بندیزونو په لړ کې بدخشان کې د طالبانو د امربالمعروف ځواکونو، د ښځو لپاره د یوې ځانګړې شوې عکاسۍ فعالیت هم له یوه کاله وروسته ودراوه.
رخشانه: د دې عکاسۍ دوه تنه کارکوونکو رخشانۍ رسنۍ ته ویلي، د دې عکاسۍ د تړلو شفاهي امر، تازه بدخشان کې د امربالمعروف ریاست له لخوا صادر شوی دی.
دغه عکاسي د ۱۴۰۳ کال په تلې میاشت کې د بدخشان ولایت په مرکز فیض آباد ښار کې د یوې ښځې له لوري پرانستل شوه.
یوې سرچینې د هویت خوندي ساتلو سره رخشانې رسنۍ ته ویلي، د طالبانو د امربالمعروف ځواکونو دوی ته خبر ورکړی چې «ښځې نه باید له کوره د باندې کار وکړي» او دوی اړ شوې، چې خپل فعالیت ودروي.
هغې ویلي، له زده کړو څلور تنه بې برخې ځوانو نجونو په دې عکاسۍ کې کار کاوه، خو په تړل کېدو سره یې ټولې بېکاره او په کور کېناستې.
د دې عکاسۍ یوه کارکوونکې په (مستعار نوم) جمیله وايي: «د سهار له اتو د مازیګر تر څلورو مو په عکاسۍ کې کار کاوه. ټول څه [محدودیتونه] نېږدې هېر شوي وو، خو اوس بیا بېرته کور ته ورګرځېدم. اندېښمنه او ستومانه یم.»
د دې عکاسۍ یوه بله کارکوونکې وايي، څه موده وړاندې د امربالمعروف ځواکونو د دوی یوه پایه کمره «له ژوندیو موجوادتو د انځور اخیستو» په تور درې ونیوه.
هغې ویلي دي: «کمره مو یوه کس ته د واده په ورځ په کرایه ورکړې وه. کله چې هغوی د انځور اخیستو لپاره تللي وو، طالبانو کمره ترې نیولې او ویلي یې وو، له ژوندیو موجوداتو انځور اخیستل منع دي.»
طالبانو په هېواد د خپلې واکمنۍ په تېرو څه باندې څلورو کلونو کې، د نجونو او ښځو پر اساسي حقونو او خپلواکیو د محدودیتونو لګولو تر څنګ، له کوره بهر هم د هغوی فعالیت بند کړی دی.
د دې محدودیتونو د لګولو په ترڅ کې هغه ښځې او نجونې چې د خپلو کورنیو ډوډۍ راوړونکې وې او په دولتي ادارو او یا خصوصي سکتور کې یې کار کاوه، بېکاره او پر کور کېناستې.
