افغانستان کې د ملګرو ملتونو د سیاسي استازولی دفتر (یوناما) وايي، د سیاسي او سولې په چارو کې د دې سازمان د سرمشني مرستیالې روزماري ډی کارلو، له طالب چارواکو سره لیدنه کې له هغوی غوښتي، چې پر افغان ښځو او نجونو ټول لګول شوي محدودیتونه لرې دي.
رخشانه: یوناما پرون (یکشنبې د سلواغې ۵ مه) په خپله فسبوک پاڼه د یوې اعلامیې په خپرولو سره لیکلي، په سیاسي او سولې په چارو کې د ملګرو ملتونو د سرمشني مرستیالې رسمي سفر پای ته ورسېده.
یوناما لیکلي، هغې د دې سفر په ترڅ کې له طالب چارواکو، کابل کې د دیپلوماتیکې ټولنې، ښځو، مدني ټولنې له استازو او افغانستان کې د ملګرو ملتونو له ښځینه کارکوونکو سره ولیدل.
اعلامیې راوړي: «ډي کارلو له طالب چارواکو سره په لیدونو کې، د ملګرو ملتونو په ښځینه کارکوونکو او زده کړې، کار او په ټولنه کې عامه ژوند ته د افغان ښځو په لاسرسي، د پراخو محدودیتونو په اړه ژوره اندېښنه څرګنده او د دې محدودیتونو د ژر تر ژره لرې کولو غوښتنه یې وکړه.»
د ملګرو ملتونو د سرمنشي مرستیالې له طالبانو غوښتي، چې «د دوحې پروسه کې په فعاله او هر اړخیزه توګه برخه واخلي او خپلې نړیوالې ژمنې، چې له نړیوالې ټولنې سره د افغانستان د بیا ځلي ادغام لپاره اړینې دي، عملي کړي.»
همدارنګه هغې د افغانستان له پولو د بشري مرستو په آزاد لېږد ټینګار وکړ او په دې برخه کې یې د طالبانو د همکارۍ غوښتنه وکړه.
ډي کارلو د ملګرو ملتونو له افغان ښځینه کارکوونکو سره په لیدنه کې د افغانستان له خلکو د هغوی د حیاتي او ارزښتناکه رول ستاینه او له هغوی سره یې خپل پیوستونو څرګند کړ.
روزماري ډي کارلو هم په خپله اېکس پاڼه د یوه پوسټ په خپرولو سره لیکلي، چې افغانستان ته یې د خپل سفر او له طالب چارواکو سره د لیدونو په ترڅ کې د ملګرو ملتونو په ښځینه کارکوونکو د لګولو شویو محدودیتونو د لغوه کېدو په اړه خبرې اترې کړې دي.
هغې لیکلي چې «هغه افغان ښځې چې له ملګرو ملتونو سره کار کوي، باید وکولی شي خپل دفتر ته بېرته ستنې شي، تر څو د افغانستان د خلکو خدمت وکړي.»
مېرمن ډي کارلو ویلي، له افغان ښځو او د مدني ټولنې له استازو سره یې لیدنه کې، د بشري حقونو د وضعیت په اړه خبرې اترې وکړې او د طالبانو له لوري پر افغان ښځو او نجونو د ټولو لګول شویو محدودیتونو د لرې کولو غوښتونکې شوه.
په سیاسي او سولې چارو کې د ملګرو ملتونو د سرمنشي مرستیالې رسمي سفر په داسې حال کې پای ته رسېږي، چې د طالبانو تر واک لاندې افغانستان، کې ښځې او نجونې له خپلو لومړنیو حقونو محرومې کړای شوې دي.
