طالبانو د روانې اوونۍ په اوږدو کې په هرات، خوست، کابل، بدخشان، غور او پکتیکا کې د یوې ښځې په ګډون ۶۱ تنه د بېلا بېلو تورونو له امله، د خلکو په وړاندې په دورو وهلي دي.
رخشانه: دا کسان، د نشه يي کوونکو توکو د پېر او پلور، نامشروع اړیکې، لواطت، له واړه بهر جنسي اړیکې، غلا، تښتولو او له کوره د تېښتې په تورو په دغه شپږو ولایتونو کې د خلکو په وړاندې په دورو وهلي دي.
یکشنبې د (سلواغې ۵ مه) یو تن له واده بهر جنسي اړیکې په تور د هرات په انجیل ولسوالۍ کې د خلکو په وړاندې ۳۹ دورې وهل شوی او په لس میاشتې بند محکوم شوی دی.
دوشنبې د (سلواغې ۶ مه) ۳۷ تنه د نشه يي توکو د پېر او پلور، نامشروع اړیکې، لواطت او له واده بهر جنسي اړیکې په تورونو په خوست او کابل کې په دورو وهل شوي دي.
۳۶ تنه د نشه يي توکو د پېر او پلور، نامشروع اړیکې او لواطت په تورونو په خوست ولایت کې د خلکو په وړاندې له ۱۰ تر ۳۹ دورو وهل شوي.
دا کسان د محکمې د پرېکړې له مخې له یوه تر دوه کلونو تنفذي بند باندې هم محکوم شوي دي.
یو تن بیا له واده بهر د جسني اړیکې په تور په کابل کې د طالبانو د څلورم زون د ابتدایه محکمې له خوا ۳۵ دورې وهل شوی او په دوه کاله بند محکوم شوی دی.
سه شنبې د (سلواغې ۷ مه) د یوې ښځې په ګډون درې تنه، د غلا، تښتول او له کوره د تېښتې په تورونو په بدخشان او غور ولایتونو کې په دورو وهل شوي دي.
یو تن د غلا په تور د بدخشان په درواز ولسوالۍ کې د خلکو په وړاندې ۳۹ دورې وهل شوی، خو معلومه نه ده، چې څومره بند سزا ورته اورول شوې ده.
د یوې ښځې په ګډون دوه تنه بیا د تښتولو او له کوره د تېښتې په تور، د غور ولایت په دولت یار ولسوالۍ کې ۳۶ دورې وهل شوي او په شپږ میاشتې تنفذي بند محکوم شوي دي.
چهارشنبې د (سلواغې ۸ مه) د پکتیکا ولایت په مټاخان ولسوالۍ کې دوه تنه د لواطت په تور د خلکو په وړاندې ۳۵ دورې وهل شوي او په درې کاله بند محکوم شوي دي.
نن پنشنبې (د سلواغې ۹ مه) کابل کې ۱۸ تنه د نشه کوونکو ګولیو او الکولي مشروباتو د پېر، پلور او قاچاق په تور له ۱۵ تر ۳۹ دورو و وهل شول او له اوو میاشتو تر دوه کاله او شپږ میاشتو پورې د تنفذي بند سزا ورته اورول شوې ده.
