د اروپا د پارلمان غړې هانا نویمان د طالبانو د جزايي محکمو د اصول نامې د توشېح په غبرګون کې وايي چې «دا د ښځو او نجونو سره جنستي توپیر او بالفعل غلامي قانوني کوي.»
رخشانه: هغې پرون ناوخته (چهارشنبې د سلواغې ۸ مه) په خپله اېکس پاڼه د یوه پوسټ په خپرولو سره د طالبانو د محکمو جزايي اصول نامې توشېح ته نغوته کړې او لیکلي یې دي چې «د جنایاتو په تړاو د طالبانو ځواب وینه شا ته غورځول شوې ده.»
هانا نویمان پر دوام ټینګار کړی، چې له طالبانو سره هېڅ عدالت روانه نه دی.
د طالبانو د محکمو جزايي اصول نامه تازه د دې ډلې د مشر ملا هبت الله اخوندزاده له خوا توشېح شوې ده.
د دې سند د منځپانګې توشېح او غیر رسمي خپرېدا د بشري حقونو د بنسټونو او نړیوالې ټولنې تر منځ پراخ غبرګونونه راپارولي دي.
د افغانستان د بشري حقونو لپاره د ملګرو ملتونو ځانګړي استازي ریچارد بنټ ویلي، د طالبانو د محکمو جزايي اصولې نامې پایلې د افغانستان د خلکو لپاره اندېښمنوونکې دي.
بنټ څو ورځې وړاندې په خپله اېکس پاڼه لیکلي وو چې د طالبانو د محکمو د جزايي اصول نامې د څېړلو په حال کې دی او «سره له همدې اوسه بشپړه معلومه ده، چې دې هغې پایلې د افغانستان د خلکو لپاره ډېرې اندېښمنوونکې دي.»
د بشري حقونو بنسټ رواداري د تېرې اوونۍ د چهارشنبې په ورځ د (سلواغې اوله) په یوه راپور کې ویلي، دوی د «طالبانو د جزیايي محکمو اصول نامه» تر لاسه کړې، چې د بشرحقونو د نړیوالو معیارونو او د عادلانه محکمې له بنسټیزو اصولو سره ښکاره په ټکر کې ده.
په دې سند کې د مذهبي لږکیو پر وړاندې تبعیض او د خلکو د اساسي خپلواکیو ځپل، له هغې جملې، د انساني کرامت تر پښو لاندې کول، د بیان او فکر د خپلواکۍ ماتونه، خپل سرې نیونې او سزاوې رسمي او قانوني شوې دي.
د طالبانو د محکمو په جزايي اصول نامه کې د حنفي مذهب لارویان مسلمان او له «اهل سنت او جماعت» سره د نورو ټولو مذهبونو او بېلا بېلو باورونو مخالف پیروان «د سرپېچوونکو او بدعتیانو» په توګه یاد شوي دي.
د طالبانو له لوري د دې قانون توشېح کېدو په خواله رسنیو ډېر غبرګونونه راپورته کړي دي. د بشري حقونو فعالانو دا قانون د نړیوالو اصولو او کړنلارو خلاف بللی ویلي یې دي، طالبان د دې قانون په توشېح کولو سره خپلو جنایتونو ته د مشروعیت ورکولو په لټه کې دي.
